“Neftçi”də işlər yaxşı deyil
Mövsümə böyük iddialarla və yaxşı transferlərlə başlamış paytaxt klubu ilk yarıdan sonra heç də arzuolunan vəziyyətdə deyil.
İtaliyalı baş məşqçi Roberto Bordin üçün istənilən şərait yaradılsa da, o, öz üzərinə düşən vəzifənin öhtəsindən gələ bilməyib.
Əvvəlcə Avropa Liqasının təsnifat mərhələsində mübarizəni 3-cü mərhələdə dayandıran klub bütün diqqətini daxili yarışlara cəmləsə də, burda da işlər gözlənildiyi kimi getmir.
Premyer Liqada mövüsmün ilk yarısında meydana çıxdığı 14 oyunun yarısında xal itkisi ilə üzləşən “Neftçi” fasiləyə lider “Qarabağ”ın 6 xal gerisində yollanıb.
Üstəlik ölkə kubokunun hər iki oyununda “Sumqayıt”a qol vura bilməməsi və mübarizəni dayandırması artıq rəhbərliyin səbrini daşırıb.
Nəzərə alsaq ki, Avroliqadakı oyunları səbəbindən ölkə çempionatına çox diqqət ayıra bilməyən və ardıcıl bir neçə matçda xal itkisi ilə üzləşən “Qarabağ”ın bu qədər büdrəməsi fonunda aradakı xal fərqi hələ də bu qədər yüksəkdir, deməli “Neftçi”də nə(lər)sə öz yolunda getmir.
Bəs bu uğursuzluğun günaharı kim(lər)di?
Təbii ki, bir komandada oyun planında axsaqlıq olanda yada ilk olaraq baş məşqçi düşür. Bu dəfə də birinci tənqid olunan şəxs Bordindir. Əvvəlcə sosial şəbəkədə azarkeşlərin qəzəbinə tuş gələn italiyalı artıq rəhbərliyin inamını da itirib.
Hətta mətbuatda yayılan xəbərlərə inansaq, futbolçular da komanda daxilində üsyana qalxıblar və sinyor Bordinin rəhbərliyi altında oynamaq istəmədiklərini deyiblər. Onlar xüsusilə də “Sumqayıt”la son oyunlardakı uğursuzuluğun əsl səbəbkarı kimi baş məşqçini və onun taktikalarını görürlər.
Amma hər kəsin, hətta rəhbərliyin də narazı olduğu adamı yollamaq o qədər də asan iş deyil. Çünki klubla müqaviləsi davam edən italiyalı öz xoşu ilə istefa verməyə yanaşmır. Onun nə vecinədi axı, klub qazansa da, qazanmasa da, öz pulunu alacaq.
Rəhbərlik isə iki od arasında qalıb. Ya külli miqdarda təzminat ödəyib Bordini qovmalı, ya da onun işlərinə hələ bir xeyli müddət də dözməlidir.
Amma iş təkcə klubun prezidenti və icraçı direktoru ilə yekunlaşmır axı. Kamran Quliyevi bir gecədə “Suqmayıt”dan gətirib “Neftçi”yə prezident qoyanlar indi ondan nəticə tələb edirlər. Təsisçilər üçün maraqlı deyil, sən bunu necə edirsən. Amma sən bunu etməlisən.
SOCAR kluba kifayət qədər maliyyə ayırıbmı? Ayırıb.
Klub üçün müxtəlif təşkilatlar, şirkətlər sponsorluq müqaviləsinə cəlb olunubmu? Olunub.
Maaşlar, “premiyalar”, digər ehtiyaclar vaxtlı-vaxtında ödənirmi? Ödənir.
Onda buyur nəticə ver də.
Verə bilmirsən? Həə, bax burda “Kərəmi ağlamaq tutur”.
Səriştəsiz idarəçilik, həm məşqçi, həm də futbolçuların yanında sözlərinin yüngüllüyü, nəzarətin demək olar ki, tamamən əldən verilməsi elə hazırkı prezident və onun komandasının da “Neftçi”dəki ömrünün sonunun yaxınlaşdığından xəbər verir.
Çox güman ki, fasilə dönəmində bu klubda radikal dəyişikliklərə şahidlik edəcəyik. Baş məşqçinin yollanacağı daha böyük ehtimal olsa da, prezident və onun ətrafının da gedəcəyi gözlənilir.
Azarkeşlərin isə indiki halda ölkənin ən köklü klubunun düşdüyü bu hala baxıb təəssüflənmək, onu bu hallara salanları lənətləməkdən başqa əllərindən bir şey gəlmir.
