AFFA-nın Hesabat-seçki Konfransı nəhayət keçirildi.
Əvvəldən də nəzərdə tutulduğu kimi bugünkü Konfransda həm Assosiasiya prezidentinin, həm də İcraiyyə Komitəsinin üzvlərinin kimliyi bəlli oldu. Sözün düzü, bu, o qədər də maraqla gözlənilmirdi, çünki əvvəldən bilinirdi ki, prezident postuna sadəcə bir, 12 yerlik İK üzvlüyünə isə sadəcə 12 namizəd var idi. Seçki adı verilən yığıncaq bir növ təyinat xarakterli idi ki, elə də oldu.
Əsas maraqla gözlənilən məsələ isə vitse-prezidentlərin, xüsusilə də İcraçı vitse-prezidentin kim olacağı idi.
Diqqətli oxucularımız xatırlayar, hələ yanvarın əvvəlində baş tutmuş növbədənkənar konfransdan və AFFA Nizamnaməsinə edilən dəyişikliklərdən sonra dərc etdiyimiz yazıda yeni Nizamnaməyə görə İcraçı vitse-prezident postunun nə qədər önəmli olduğunu və bu vəzifəyə təyin olunacaq şəxsin faktiki ölkə futboluna rəhbərlik edəcəyini qeyd etmişdik.
Üstəlik onu da vurğulamışdıq ki, əgər sözügedən vəzifəyə Baş katib Elxan Məmmədov təyin olunsa, bu, AFFA-da “Məxməri inqilab” olacaq. Yəni qurumun faktiki prezidenti Rövnəq Abdullayev olsa da, həm qərarverici, həm də icraedici orqanlar Məmmədovun rəhbərliyi altında cəmlənəcəkdi.
Bugünkü iclasdan sonra proqnozlarımız özünü doğrultdu. Baş katib Elxan Məmmədov hazırkı vəzifəsini saxlamaqla yanaşı həm də İcraçı vitse-prezident oldu və Azərbaycan futbolu üzərində hakimiyyətini elan etdi.
Əslində bu təyinatdan sonra digər vitse-prezidentlərin kimliyi o qədər əhəmiyyətli olmasa da, informasiya xatirinə qeyd edim ki, keçən dönəmdə bu vəzifədə olmuş Rauf Əliyev və Elşad Nəsirovla yanaşı, AFFA yanında Məşqçilər Komitəsinin sədri, Vaqif Sadıqov da bundan sonra vitse-prezident statusu daşıyacaq.
Yeni heyətin ilk qərarı bu oldu ki, bundan sonra ölkə futbolu İK üzvləri arasında bölüşdürüləcək və hər üzv bir sahəyə nəzarət edəcək. Yəni konkret kurasiyalar təyin olunub və hərə öz kəndində ağalıq edəcək.
Məsələn, uzun illərdir futzaldan məsul olan, vaqonlarla braziliyalı legionerlər gətirən, bununla da ölkə futzalını kor qoyan, həmçinin “Keşlə” klubunun da rəhbəri olan Zaur Axundov yenə bu sahəyə nəzarət edəcək;
80 yaşında hələ də vəzifədən gözü doymayan, Azərbaycan futbolunu kor qoyanlardan biri Kazbek Tuayev futbol veteranları ilə iş üzrə məsul olacaq;
AFFA İK-da nəyə görə təmsil olunduğunu bəlkə özü də bilməyən Xarici İşlər naziri Elmar Məmmədyarov beynəlxalq əlaqələr üzrə cavabdehlik daşıyacaq;
Azərbaycanda uşaq futbolunun bərbad olduğu bir vəziyyətdə Almaniyada uşaq futbol məktəbi açıram deyib milyonlarla pulu havaya sovuran Rauf Əliyevə yenə uşaq futbolunu ağ günə çıxarmaq tapşırılıb və s.
Bütün bunların fonunda Azərbaycan futbolu bataqlığın dibinə doğru yumalanır.
Milli komanda bərbad çıxış edir, uşaq futbolu pis vəziyyətdə, bölgələrdəki stadionlarda mal-qara otlayır, adı Premyer Liqa olan ölkə birinciliyində cəmi 8 komanda çıxış edir ki, onun da 6-sı Bakını təmsil edir, 8 komandadan dördü eyni yerdə maliyyələşir, milli komandada milliləşdirilmiş legionerlər at oynadırlar, “Qarabağ” xaric, klublarımız “Biləcəridən o tərəfə” keçən kimi qapazaltı olurlar, birinci divizion qumarxanaya dönüb və s.