Böyük ehtimalla ABŞ-da baş vermiş hansısa helikopter qəzası və dörd nəfərin ölümü dünya üçün önəmli xəbər olmazdı. Uzaqbaşı günün xronikasına adi statistika kimi düşə bilərdi, amma bu helikopter bir əfsanəyə aiddirsə və ölənlərdən ikisi də o və qızıdırsa…
Ötən gecə bir anda bütün dünyanın gündəmi bu xəbər oldu. Əfsanəvi basketbolçu, təkcə NBA-in deyil, dünya idmanının ən önəmli fiqurlarından biri Kobe Bryant helikopter qəzasında yanındakı dörd nəfərlə birlikdə vəfat edib.
Sonradan yanındakılardan birinin qızı Gianna olduğu açıqlandı.
Kobe 20 illik möhtəşəm karyeraya malik əfsanə idi. 1996-cı il “draft”ında “Şarlotta Hornets” tərəfindən 13-cü sıradan seçilsə də, bu komanda ilə heç bir oyuna çıxmadan “Los-Anceles Leykers”ə verilmiş və inanılmaz 20 illik dönəm beləcə başlamışdı.
Kobe bu komandanın heyətində 5 dəfə NBA çempionluğu, ABŞ millisi ilə isə iki dəfə Olimpiya birinciliyi qazanmışdı.
Onu saysız-hesabsız şəxsi rekordları, uğurları ilə xatırlayacağıq. “Black Mamba” ləqəbli Bryantın NBA tarixinin ən çox xal toplayan ən yaxşı üçüncü basketbolçusu, 30 min xal həddini aşan ən gənc oyunçu, bir matçda ən çox xal toplayan ikinci basketbolçu, dəfələrlə həm normal mövsümün, həm də pley-offların ən dəyərli oyunçusu (MVP) və digər şəxsi uğurları var idi.
Kobe bir nəslə basketbolu sevdirən adam idi. Hətta rəqib komanda azarkeşləri tərəfindən də sevgi və hörmətlə anılmaq hər idmançıya nəsib olmur.
İqtisadiyyat kitablarında fürsət xərcinə (opportunity cost) dair “case study”lərdə Kobenin kareyası nümunə kimi göstərilir. Yəni, Kobe Bryant orta məktəbi əla göstəricilərlə bitirməsinə baxmayaraq, hanısa bir universitetə qəbul olmaq və diplom almaq əvəzinə basketbolçu olmağı seçir və beləliklə də daha zəngin və məşhur biri olur.
Kobe Bryant hətta kiçik məsafəli yollar üçün avtomobil əvəzinə daha çox helikopterdən istifadə etdiyinə görə müxtəlif dövrlərdə jurnalistlərin və azerkəşlərinin iradları ilə rastlaşırdı. O isə zamanın qiymətli olduğunu bildirirdi.
2009-cu ildə olan müsahibəsindən:
“Kaliforniyada evimlə iş arasında məsafə 49 mildir, tıxac zamanı hətta ferrari ilə də getsən 10 saatdan çox vaxtın gedir. Tez çıxsan, oyuna yorğun gedirsən. Əgər oyundan ildə 23 milyon dollar qazanırsansa, o zaman helikopterdən istifadə olduqca praktikdir.”
Düşünmək olar ki, Kobe Bryant başqa bir peşə seçsəydi, bəlkə də bu qədər zəngin və ya məşhur olmazdı, helikopter əvəzinə avtomobil və ya avtobusdan istifadə edərdi və belə bir qəza da olmazdı. Ancaq o zaman da 5 qat NBA çempionu Kobe Bryant da olmayacaqdır.
2016-cı il, aprelin 13-də karyerasının son matçında “Yuta Cazz”la oyunda topladığı 60 xal və yubiley nitqi illər keçsə də, həmişə yaddaşlarda qalacaq.
Son nitqində onu sevənlərə, ailəsinə, azarkeşlərə, komanda yoldaşlarına təşəkkür edən Kobe sözlərini belə bitirmişdi: “Mamba out”.
Karyerası boyunca məşqlər, oyunlar səbəbindən ailəsi ilə kifayət qədər maraqlana bilmədiyi və onları yalnız qoyduğu üçün həyat yoldaşından üzr istəyən Mamba onları yenə tək qoydu.
Kobe təkcə “Leykers” azarkeşlərinin deyil, bütün idmansevərlərin, NBA fanatlarının, basketbol vurğunlarının kumiri, sevimlisi idi.
Rest in Peace, Mamba.
Səhifəmizdə hər hansı səhv və ya qeyri-dəqiq məlumat gördükdə, həmin mətni seçib Ctrl+Enter düymələrini sıxaraq bu barədə bizə məlumat verməyinizi xahiş edirik.
