Dövrələrarası fasilə başlayandan sonra Azərbaycan futbolunda səssizlik hökm sürürdü. Klublar Antalyada təlim-məşq toplanışında olduqları bir vaxtda, AFFA rəhbərliyi də növbəti konfransa hazırlıqla məşğul idilər.
Ötən yazımızda konfransın nə dərəcədə taleyüklü olması və bir sıra dəyişikliklərin olacağı barəsində oxucularımıza bəhs etmişdik.
Aradan keçən müddətdə fırtına öncəsi səssizlik hökm sürsə də, arada danışlımış oyunlarla bağlı açıqlanan bir məlumat balaca dalğalanma yaratdı.
Belə ki, İcraiyyə Komitəsinin son iclasında danışılmış oyunlarla bağlı müəmmalı açıqlama verən Baş katib Elxan Məmmədov bu işdə tanımış adamların adının da hallandığını vurğulamışdı.
Aradan bir neçə gün keçəndən sonra açıqlanan siyahı isə diqqət çəkməyə bilməzdi. Oyun alqı-satqısı ilə bağlı uzaqlaşdırlan şəxslərdən daha bir neçəsinin adı ictimaiyyətə bəlli oldu ki, onlardan biri “Qarabağ”ın keçmiş futbolçusu Namiq Yusifov, digər ikisi isə Birinci Divizionda mübarizə aparan “Səbail-2” komandasının üzvləri idi.
Ötən yazımın sonunda da qeyd eləmişdim ki, Baş katib müəmmalı açıqlama ilə kimlərəsə mesaj ötürür. Bu dəfə isə dediklərimiz qismən təsdiq olundu. Çünki “Səbail”in AFFA prezidenti Rövnəq Abdullayevin oğluna məxsus olduğu Azərbaycanda futbolla maraqlanan istənilən şəxsin bildiyi bir həqiqətdir. Deməli, Məmmədov prezidentin dolayısı ilə sahibi olduğu klubu oyun alqı-satqısı məsələsində ifşa edirsə, bu, artıq hücumdur.
Dünən isə, yəni AFFA-nın növbəti hesabat seçki konfransına 10 gün qalmış İcraiyyə Komitəsinə namizədlərin adları açıqlandı. Yanvarın 28-də baş tutacaq konfransda İK-ya 12 nəfər üzv seçiləcək.
Bura qədər olan hissə işin prosedur qaydasıdır və nizamnaməyə görə, hər şey qaydasında gedir.
Namizədlər arasında isə yeni adlar görürük və komitənin keçmiş üzvlərindən birinin adı bu dəfə qeyd olunmayıb.
Gəlin, əvvəlcə adı qeyd olunmayan keçmiş üzvlə bağlı danışaq. “Qarabağ”ın baş məşqçisi, Azərbaycanın müstəqillik tarixinin ən uğurlu personası Qurban Qurbanov bundan sonra İK-da təmsil olunmayacaq. Bunun səbəbləri barəsində geniş danışmaq istəmirəm, çünki əvvəlki yazılarımda bununla bağlı dəfələrlə bəhs etmişik. Məlumatsız oxucular baxıb, fikir sahibi ola bilərlər.
Gələk yeni adlara. Bunlardan biri, Şimal Futbol Federasiyası tərəfindən namizədliyi irəli sürülmüş Elxan Məmmədovdur. Bəli, qurumun hazırkı Baş katibi. Nizamnaməyə görə, Baş katib İK üzvü ola bilməz. Əgər onun namizədliyi qeydə alınıbsa, deməli, növbəti periodda Məmmədov artıq Baş katib olmayacaq. Əvvəl də bəhs etdiyimiz kimi, böyük ehtimalla, bütün səlahiyyətləri əlində cəmləşdirən İcraçı vitse-prezident məhz Elxan Məmmədov təyin olunacaq.
Digər sürpriz namizəd isə Olimpiya çempionu, Yunan-roma güləşi üzrə Azərbaycanın ən uğurlu idmançılarından biri olmuş Fərid Mansurovdur.
Yenə qeyd etməliyəm ki, ötən yazımda dövlətin prosesə hansısa müdaxiləsinin gözlənildiyini bildirmişdim. Bu namizədliyin həmin müdaxilə olduğunu düşünürəm. Belə ki, Mansurov Gənclər və İdman Nazirliyinin İdman şöbəsinin müdiridir. İdmançı karyerasında uğurları və nüfuzu ilə yanaşı idarəetmədəki fəaliyyəti ilə də kifayət qədər yaxşı təsir bağışlayan keçmiş pəhləvan haqqında kulislərdə növbəti nazir kimi danışılır. Deməli, onun AFFA-nın idarəetməsində də iştirakı istənilib və Mansurov böyük ehtimalla İK üzvü olacaq.
AFFA prezidentliyinə isə sadəcə bir namizəd qeydə alınıb ki, bu son 12 ildir futbol təsərrüfatına rəhbərlik edən Rövnəq Abdullayevdir.
Qalır yanvarın 28-də baş tutacaq konfransı gözləmək. Prezident bəllidir, həm İcraçı, həm də digər vitse-prezidentlərin kimliyinə isə məhz həmin gün aydınlıq gələcək.
