İkinci Qarabağ müharibəsinin ilk günündən etibarən prezident İlham Əliyevin sosial şəbəkələrdəki hesabları, xüsusilə, “Twitter” hesabı daha aktiv istifadə olunurdu. Hökumətin xalqla kommunikasiyası baxımından yeni bir praktika olduğu üçün bu halı bir növ paradiqma dəyişikliyi də hesab etmək mümkündür. Belə bir proses ilk dəfə Ağ Evin mətbuat katibinin, ABŞ prezidenti Donald Trumpın tvitlərinin rəsmi bəyanat statusunda olduğunu qeyd etməsi ilə (daha sonra Ədliyyə Nazirliyi də bu halı təsdiqləmişdi) baş vermişdi.
Qeyd etmək olar ki, Azərbaycanda bu dəyişiklik xalq tərəfindən çox sürətlə mənimsənildi. Bu dəfə etimad edilə biləcək tam əsaslı bir mənbə vardı və cəbhədən gələn qeyri-rəsmi xoş xəbərlərə qeydsiz-şərtsiz inanmaq əvəzinə, yeni rabitə dilində ifadə etsək, “tviti gözləyək” deyilirdi.
Həmçinin prezidentin sosial şəbəkə hesablarının koordinasiyalı idarəsində də “Twitter”in önə çıxarılması müşahidə olunurdu. Belə ki, “Facebook” və “Instagram” hesablarında da, adətən, tvitlərdən hazırlanmış, @azpresident istifadəçi adı və “Twitter” loqosu əlavə edilmiş kontent paylaşılırdı. Bu isə öz növbəsində məsələnin sadəcə sosial şəbəkə hesablarının aktivləşdirilməsi olmadığını, kommunikasiyanın əsas forması kimi “Twitter”in seçildiyini göstərirdi.
İlham Əliyevin “Twitter”də istifadə etdiyi ritorikanın əsas tərkib hissəsi – xalq və dövlət lehində mədhiyyə, habelə xalq-dövlət birliyinin güclü şəkildə təmini məqsədilə xalqın iradəsinin dövlətin iradəsində təcəssüm etdiyi ilə bağlı mesajın təlqinindən ibarətdir. Ritorikanın nə qədər uğurlu alındığını isə sözügedən məzmunun açıq şəkildə büruzə verildiyi tvitlərə gələn reaksiyalardan müəyyənləşdirmək olar.
Haqq yolundayıq, yumruq kimi birik. Bu birlik əbədidir!
— İlham Əliyev (@azpresident) October 26, 2020
Hər gün bayrağımız yeni bir yaşayış məntəqəsində ucaldılır. Budur, Azərbaycan dövlətinin, Azərbaycan xalqının gücü.
— İlham Əliyev (@azpresident) October 21, 2020
Biz bu gün həmrəylik, qarşılıqlı dəstək, birlik göstərərək şanlı tarix yazırıq. Biz xoşbəxt nəsilik ki, bu sevincli günləri görə bilirik.
— İlham Əliyev (@azpresident) October 17, 2020
Biz bundan sonra qürur hissi ilə yaşayacağıq – müzəffər xalq, güclü dövlət, yenilməz ordu, güclü iradə sahibi kimi.
— İlham Əliyev (@azpresident) November 17, 2020
Başqa bir maraqlı nüans isə odur ki, cənab prezidentin televiziya çıxışlarında tez-tez təkrarladığı “mən” vurğusuna tvitlərində, demək olar ki, rast gəlinmir. Bu baxımdan xarici media orqanlarına verdiyi müsahibələrdən çıxarışlar kimi paylaşılan tvitlərdə də müəyyən mənada seçicilik olduğu görünürdü. Özünü vurğulaması isə xalq iradəsi müstəvisində tərənnüm edilərək çatdırılırdı:
Mənim əsas amalım Azərbaycan xalqının etimadını doğrultmaq, bu vəzifədə olduğum bütün illər ərzində verdiyim vədləri yerinə yetirmək və ölkəni inkişaf yolu ilə aparmaq, onun ərazi bütövlüyünü təmin etməkdir.
— İlham Əliyev (@azpresident) October 16, 2020
Həmçinin, dövlət başçısının televiziya çıxışlarında hətta parodiya edərək hədəf aldığı Başqa fiquruna (Paşinyan) tvitlərdə qəti şəkildə yer verilmirdi. Bu hal onu, “Twitter”i əsas kommunikasiya vasitəsi kimi istifadə edən sağ populist liderlərdən fərqləndirən bir xüsusiyyətdir.
Son olaraq onu da qeyd etmək lazımdır ki, prezindentin tivtlərində müharibənin müvəqqəti zərurət olduğu, ardınca sülh dövrünün gələcəyi də vurğulanırdı.
Biz Qarabağ regionunun gələcəyini dinc bir ərazi kimi görürük. Biz öz investisiyalarımızla və quruculuq təcrübəmizlə bu regionu dünyanın ən firavan regionlarından birinə çevirə bilərik. Lakin bundan ötrü müharibənin nəticələri aradan qaldırılmalıdır.
— İlham Əliyev (@azpresident) October 27, 2020