Xaricdə yaşayan azərbaycanlı yazar və publisistlərin birgə ərsəyə gətirdikləri Azlogos.eu saytı yeni bir layihəyə başlayıb. Sayt publisistlər üçün “İdentifikasiya axtarışında: siyasi kimlik və milli ideya” adlı yazı müsabiqəsi elan edib.
Müsabiqə ilə bağlı musavat.com-a danışan saytın həmtəsisçilərindən biri, İsveçrədə yaşayan Ələkbər Əliyev bildirib ki, məqsəd cəmiyyətdəki milli kimliyimizlə bağlı fikir ayrılığına aydınlıq gətirmək və cəmiyyətin düşünən insanlarının iştirakı ilə müzakirə etməkdir:
“Biz, AzLogos olaraq düşünürük ki, bu bizim hamımızın həmrəy olduğumuz bir problemdir. Milli kimlik məsələsində biz gürcülərdən və ermənilərdən fərqli olaraq hələ bir qərara gələ bilməmişik. “Azərbaycanlı” ifadəsi ilə razı olmayanlar da var, özlərini etnik azlıq adlandıranlar var, türk adlandıranlar var. Cəmiyyətdə bir konsensus yoxdur. Biz bu konsensusun olmasını və cəmiyyətin ziyalı təbəqəsinin, düşünən insanların bu mövzudakı fikrini bilmək istəyirik. Ona görə bu müsabiqə elan olundu”.
Ə.Əliyev qeyd etdi ki, mövzunun adı da çox aydın qoyulub və orada suala yer yoxdur: “Qələminə güvənənlər yazsınlar görək biz kimik və hara gedirik. Bu olmadan, milli kimliyimizlə bağlı məsələyə aydınlıq gətirmədən əsla heç nə düzəlməyəcək. Biz 10 milyonluq bir xalq olaraq konsensusa varmalıyıq. Bu qədər fikir haçalanması, ixtilaf yaşanması onu göstərir ki, bu şəkildə nə Qarabağ problemini həll edə biləcəyik, nə də tam formalaşmış bir dövlət, xalq ola biləcəyik.
Müsabiqənin şərtlərinə gəlincə, publisistlərdən yazılarında Azərbaycan xalqının siyasi xalq kimi təşəkkül tapmasının tarixi və bu tarixə müxtəlif yanaşmalar; milli kimlik axtarışları; milli ideya və ideologiya kimi anlayışların müasir dünyada yeri; etnik mənsubiyyət və s. kimi mövzuları əhatə etmələri gözlənilir.
«Biz kimik, hara gedirik, bizi nə birləşdirir?» – bizi narahat edən sual budur.
Yaradıcılıq fantaziyasına məhdudiyyət qoymaq istəməsək də, buna məcburuq. Beləliklə:
– Dil publisistik olmalıdır (bədiilik esse janrı çərçivəsində məqbuldur, hekayə istəmirik).
– Yazılar 10 min işarəni keçməməlidir.
Daha əvvəl heç bir yerdə dərc olunmamış yazılar redaksiya@azlogos.eu ünvanına göndərilir.
Yazıları bizə gerçək ad və soyadınızla yox, təxəllüslə göndərməlisiniz. Müsabiqədə qalib gəldiyiniz təqdirdə, e-mail vasitəsilə sizə xəbər veriləcək. Seçəcəyiniz təxəllüsün sizə məxsus olduğunu nəticələr açıqlanana qədər, publik sferada elan etdiyiniz təqdirdə, müsabiqədən kənarlaşdırılacaqsınız.
Yazıların qəbulu 5 sentyabr-25 oktyabr 2019 tarixləri arasında həyata keçiriləcək.
Qaliblər 20 noyabra qədər müəyyənləşəcək və həmin gün elan olunacaq. Qalib gələn müəlliflərdən gerçək ad və soyadları öyrənilərək, yazılarının AzLogos-da dərcinə başlanacaq.
Mükafat fondu
1-ci yer – 1000 AZN
2-ci yer – 700 AZN
3-cü yer – 500 AZN
Müsabiqədə qalib gəlməyən, lakin AzLogos-da dərci uyğun görülən yazı üçün – 100 AZN.
Musavat.com
