Sosial şəbəkələrdən əldə etdiyimiz məlumata görə, ictimai aktivistlərdən Zülfiyyə Səfxanova 2006-2008-ci illərdə nəşr olunmuş dövrün kult qəzeti “Alma”-nın demək olaraq bütün nüsxələrini toplayaraq M. F. Axundzadə adına Mərkəzi Kitabxanaya təhvil verib. Bu barədə məlumatı Zülfiyyə öz Facebook profilindən paylaşıb.
Aqşin Yenisey, Seymur Baycan, Günel Mövlud, Əli Əkbər, Elmir Mirzəyev, Firudin Allahverdi, Elnur Astanbəyli, Ağalar Məmmədov və başqa yazarların çalışdığı, şair Zahir Əzəmətin rəhbərliyi altında nəşr olunan “Alma qəzeti” “Dalğa Gənclər Hərəkatının layihəsi olmuş və 2000-ci illərin ortasında ictimai fikrə, xüsusilə də gənclərə böyük təsir buraxmış, indi şərti olaraq “İctimai sektor” adlanan gənc aktivist kəsimin yaranmasında böyük rol oynamışdır.
XXI əsrin əvvəlində Azərbaycan ictimai fikrində hansı tendensiyaların mövcud olduğunun gələcək nəsillərə çatdırılması baxımından müstəsna addım atmış Zülfiyyə Səfxanovaya mədəni ictimaiyyət adından təşəkkürlərimizi bildiririk. Qəzetlər kitabxananın müvafiq daxili prosedurlarını keçdikdən sonra, güman ki, yay sonuna doğru oxucuların ixtiyarına veriləcəkdir.
