Olduqca dəyişkən olan Azərbaycan gündəmi son günlər iki idman xəbəri ilə yeniləndi.
Bunlardan biri “Qarabağ”ın Avroliqanın qrup mərhələsində “Düdelanj”la oyunu və matçda baş verən hadisələr idisə (bu barədə geniş yazmışıq), digəri Azərbaycan qrossmeysteri Teymur Rəcəbovun Dünya Kubokunda çinli Ding Lirenlə görüşdə qalib gəlməsi və çempion olmasıdır.
Detallara girməmişdən onu qeyd edim ki, ölkə gündəminin belə intellektual hadisə ilə dəyişməsi şəxsən mənim üçün çox maraqlı və sevindiricidir.
Əvvəlcə nəzər salaq, görək, dünya kubokunda çempionluq bizə nə qazandırdı?
Son zamanlar Şəhriyar Məmmədyarovun kölgəsində qalan və mötəbər turnirlərdə zəif çıxış edən Teymur Rəcəbovun geridönüşü qeyd olunmalıdır. Azərbaycan şahmatının vunderkindi uzun zaman sonra yenidən bütün dünyada adını duyura bildi. Xüsusilə də final görüşündə çinli Ding Lirenlə oyunlarda göstərdiyi əzmkarlıq və iradə onun necə güclü bir şahmatçı olduğunu bir daha sübut etdi. Təsadüfi deyil ki, final mərhələsində son partiyaları şərh edən, hazırda dünyanın bir nömrəsi olan və altı ildir dünya çempionluğunu heç kimə verməyən Maqnus Karlsen Rəcəbovun qələbəsinə təəccübünü belə ifadə etmişdi: “Özümü axmaq kimi hiss edirəm. Son partiyada Teymura qələbə şansı verməmişdim və oyunun ən yaxşı halda bərabərlikə bitəcəyini düşünürdüm, amma Rəcəbov möhtəşəm geridönüş edərək hər kəsi təəccübləndirdi”.
Turnirdə 5 şahmatçı ilə təmsil olunan Azərbaycan Dünya Kubokunda ilk dəfə yarımfinal, final və çempionluq sevinci yaşadı. Bütün bu ilklərin altında Teymur Rəcəbovun imzası var.
Son zamanlar yaxşı formada olan və müxtəlif turnirlərdə uğurla çıxış edən Şəhriyar Məmmədyarov 1/8 final mərhələsində komanda yoldaşı Rəcəbova rəqib olmasaydı, bəlkə də hər iki şahmatçımızın ifasında yarımfinal həyəcanı yaşaya bilərdik.
Ölkə olaraq FİDE-nin dünya reytinqində ilk dəfə iki nəfərlə “ilk 10-luq”da təmsil olunmaq şansımız var.
Bütün bunlar əlbəttə ki, möhtəşəm hadisələrdi və önəmli nüanslardı.
Teymurun Dünya Kubokunu qazanması ölkə idmanı adına ən az digər fərdi növlərdə qazanılmış Olimpiya çempionluqları, dünya birincilikləri qədər vacibdir.
Lakin, bu qələbədən sonra ictimaiyyət arasında eyforiyadan yaranmış bir təəssürat, fikir var…
Teymur hazırda dünyanın ən güclüsüdürmü?
Xeyr!
Gəlin, hər şeyi, öz adı ilə çağıraq…
Çünki Dünya Kuboku ayrılıqda kifayət qədər nüfuzlu yarış olsa da, həm də dünyanın ən güclüsünə – Şahmat Tacının sahibinə qarşı oynamaq üçün təşkil olunan “İddiaçılar turniri”nə vəsiqə verən çoxsaylı yarışlardan biridir.
Yəni, dünyanın ən güclüsü olmaq istəyən şahmatçılar uzun və çətin bir neçə yoldan keçməlidirlər.
Əvvəlcə onu qeyd edim ki, Tacın hazırkı sahibi norveçli super zəka Maqnus Karlsendi. O, 2013-cü ildə hindistanlı Vişvanatan Ananda qalib gələrək əldə etdiyi dünya çempionluğunu qoruyur.
Bu titulu ondan almaq üçün isə “İddiaçıların turniri”ndə qələbə qazanmaq, ardınca isə Karlsenə qalib gəlmək lazımdır.
Yol uzun, proses çətin, hədəf uzaqdadır. Amma əlçatmaz deyil.
Yetər ki, məhz son Dünya Kubokunda olduğu kimi bütün Azərbaycan xalqının dəstəyini arxasına alan təmsilçilərimiz (Teymur Rəcəbov artıq vəsiqəni əldə edib, Şəhriyar Məmmədyarov isə bunun üçün turnirlərə qatılmalıdır) ürəklə və həvəslə oynasınlar.
