Adətən yeni bir layihə üstündə işləyəndə hər şeydən əvvəl müxtəlif memarlıq nümunələrinə baxıram. Bu, dizayn prosesinin çox böyük bir hissəsini əhatə edir desəm, yalan sayılmaz. Saatlar və bəzən günlər ancaq axtarışlar ilə keçir. Çünki dizayn çox sancılı prosesdir.
Biz memarlar təbiəti təqlid edirik, demişdim sizə? Bəli, bütün nümunələrimiz, layihələrimiz təbiətdən ilhamlanaraq düşünülür, ərsəyə gəlir. Təbiət bizim ən böyük ilham mənbəyimizdir. Söhbət əsl memarlardan, işini sevərək icra edən, yenilik axtarışında olan, lahiyəsinə öz övladı kimi yanaşan memarlardan gedir. Qayıdaq mövzumuza. Həmin sancılı proses zamanı qabağıma olduqca maraqlı lahiyə çıxdı. İlk baxışda dekorasiya kimi görünən bu açıq hava məkanının modullarını incələdikcə gözlərim qamaşdı. Memarlar təbiəti müasir texnologiya ilə harmonik istifadə edirlər və bu artıq adi haldır.
Mask Architects, beynəlxalq dizayn müsabiqəsi “Cool Abu Dhabi”nin qalibi olan on komandadan biri seçildi. Onların konseptual lahiyəsi olan Oasys, Əbu-Dabi sakinlərinin istini hiss etmədən açıq məkanlarda rahat istirahət edə biləcəyi bir sistemdir. 67 ölkədən 1570-dən çox iştirakçı arasından seçilən layihə, şəhər istilik problemini həll etmək üçün lokallaşdırılmış bir həll yolu ilə iqlim dəyişikliyinin təsirlərini aradan qaldırmaq məqsədi daşıyır.
Oasys sistemi liman və sığınacaq adaları kimi fəaliyyət göstərən stansiyalar və mərkəzlər şəbəkəsidir. Məkan insanlar üçün, istirahət yeri, fərdi və kollektiv fəaliyyət olaraq sosiallaşmaq üçün istifadə edilə bilən mərkəz rolunu da oynayır. Məkan oturma sahələri, kafelər, sərgilər, idman və s. üçün istifadə oluna bilər. Oasys sisteminin gələcəkdə məqsədi istirahət mərkəzləri yaratmaq üçün şəhərlərin ətrafında çoxsaylı şəbəkələr qurmaqdır.
Layihə müəllifi olan komanda böyüməyi planlaşdıran Abu Dabinin açıq istiliyə qarşı rahatlıq sistemlərinin iqlim böhranının təhlükələrini aradan qaldırmaq üçün dövlət və özəl məkanlarda əhəmiyyətli olacağına əmindir. Oasys sisteminin əsas funksiyası olacaq xurma ağacına bənzər strukturlar modullardan inşa edilmişdir. “Xurma”lar altdakı mexanizm vasitəsilə duman səpəcək, həm də damlar içindəki günəş panelləri vasitəsilə günəş enerjisi yığacaq.
Modul sistemlərin hamısı bir-biri ilə əlaqə qura və hər modul fərqli ölçüləndirilə bilər. Həmin modullar eyni zamanda məkanın istifadəsindən asılı olaraq müvəqqəti və ya qalıcı da ola bilər. Bu maraqlı və eyni zamanda mühəndislik möcüzəsi modullar özü-özünü bərpa edə bilən enerji ilə fəaliyyət göstərməkdədir. Məni ən çox maraqlandıran bu renderlərin gözəlliyi yox, məhz memarlığın incəliyidir. Doğrudur, vizualizasiya çox gözəl görünür, amma, işləyir ya yox, əsas məsələ budur.
Paytaxtımız üçün müxtəlif kiçik çaplı açıq hava məkanları hazırlanıb. Hamısını bir torbaya yığa bilərik. Çünki heç bir lahiyə, əgər buna lahiyə deyiriksə, mövcüd ekosistem üçün nəzərdə tutulmayıb. Yəni istifadə olunan açıq hava məkanları heç də Bakının ekoloji faktorlarına görə tənzimlənməyib. Belə olan halda vaxtından xeyli əvvəl dağıdılan, məhv edilən “gecəqondu” layihələri ilə qarşı-qarşıya qalırıq. Şəhərin brendləşməsi, hər nə qədər buna qarşı olsam da, ölkənin imici üçün olduqca vacibdir. Bu bir başa iqtisadiyyata bağlı olsa da, şəhər əhalisinin mədəniyyəti də çox böyük faktordur.
Lahiyənin detalları çox daha maraqlıdır. Döşəmə və tavan dizaynı bir-birilə harmoniya təşkil edir. Memarlığın gözəlliyi də elə burada üzə çıxır. İstifadə olunan materiallardan əlavə, funksionallıq yüksək səviyyədə icra olunmuşdur. Estetik tərəfi isə, sadəcə möhtəşəmdir. Buyurub incələyə bilərsiniz.
