Tanınmış kiyevli fotobloger-səyyah Aleksandr Çeban Ağdamda olub, inşaat ərazilərində müşahidələr aparıb. Aleksandrın çəkdiyi fotoları və paylaşdığı planları təqdim edirik.
Müasir Ağdam – Ağdam şəhərinin özü + Ağdam rayonuna daxil olan 8 kəndi əhatə edəcəkdir. Ağdamın ölçüsü 1750 hektar + 2450 hektar şəhərətrafı yaşıllıq zonası (bağlar) olacaq. Şəhərin əhalisi 100 min nəfər olacaq ki, bu da Ağdamı Qarabağın ən böyük şəhəri və Azərbaycanın 6-cı ən böyük şəhəri edəcək. Əhalinin 70%-i mənzilli binalarda, 30%-i fərdi evlərdə yaşayacaq. İlkin olaraq şəhərdə 1750 fərdi ev və 23 min mənzilli binalar olacaq. Şəhər ərazisinin 23%-i meşə və park sahələrindən (yaşıllıq sahəsi) ibarət olacaq. Ağdamda bir meşə parkı da (125 hektar) salınacaq.
Məşğulluq sabitliyini təmin etmək üçün şəhərin yaxınlığında sənaye zonası (sənaye parkları) salınacaq. Estetik komponent də unudulmayıb. Şəhərdə süni gölün yaradılması nəzərdə tutulur. Həmçinin, şəhərdən 2 kanal keçəcək, kanalların üzərində körpülər olacaq. Şəhər – tarixi mərkəz, inzibati ərazi, yaşayış ərazisi, yaşıl zona və sənaye / əkinçilik zonaları olmaqla bölgələrə bölünəcək. Tarixi mərkəzdə İmarət saray kompleksi, Qarabağ xanlarının məqbərəsi, Şahbulaq qalası və yeni bir məscid olacaqdır.
Şəhər mərkəzi Qarabağ şəhərlərinin ənənəvi memarlığı üslubunda inşa ediləcəkdir. İnzibati mərkəz futbol stadionundan (30 min nəfərlik), inzibati binaladan, teatrdan, konsert salonundan və Qarabağ Universitetindən ibarət olacaqdır. Həmçinin, şəhərdə Qələbə muzeyi və açıq hava konsert salonunun olduğu park da salınacaqdır.
Hər fərdi evə kənd təsərrüfatı ehtiyacları üçün 4-5 hektarlıq torpaq sahəsi ayrılacaqdır. Suqovuşan və Xaçınçay su anbarları və artezian mənbələri su təchizatı üçün istifadə ediləcəkdir.
Ağdam insanlar üçün komfortlu şəhər olmalıdır. Ona görə də şəhərdə böyük piyada və velosiped yolları şəbəkəsi olacaqdır. Şəhərin nəqliyyat sistemi dairəvi olacaq. Magistral yollardan ayrı bir tramvay xətti nəzərdə tutulub. Azərbaycanda ilk dəfə olaraq “ağıllı şəhər” sistemi tətbiq ediləcək.
Fotolar və mətn Aleksandr Çeban
