Facebook-dan imtina insanları daha az depressiv, məhsuldar edir, hətta maddi vəziyyətlərini də yaxşılaşdırır. Daily Mail xəbər verir ki, iki minə yaxın gənc istifadəçini əhatə edən araşdırmanın nəticələri bunu göstərir.
“(…) Ekvadorun Las Amerikas universitetindən olan iqtisadçı Roberto Moskera və həmkarları Texasın A & M Universitetinin, facebook istifadəçisi olan 1765 tələbəsinin aktivliyini müqayisə edib. Tədqiqatçılar iştirakçıları iki qrupa bölüblər: bir qrup facebookdan istifadəni bir həftəlik dayandırır, obiri qrup isə platformadan istifadəyə davam edirdi. Məlum oldu ki, facebook-dan imtina etmiş tələbələr daha məhsuldar olur, onlar özlərini daha rahat hiss etdiklərini, sağlamlığı artıran fəaliyyətlə məşğul olduqlarını, hətta daha az impulsiv alış-veriş etdiklərini və az yediklərini bildiriblər”, – məqalədə deyilir.
“Facebook, hətta sosial şəbəkədəki bilavasitə iştirakla bağlı olmayan, həyatın bir çox vacib aspektlərinə də təsir göstərir”, – tədqiqatçılar bildirir.
Alimlər, facebook-dan bir həftəlik imtinanın müqabilində tələbələrin nə qədər pul istəyə biləcəyini də öyrəniblər. Məlum olub ki, iştirakçılar ortalama olaraq 67 dollar pulu, bir həftəlik imtina üçün ədalətli hesab ediblər. Bir həftə sonra isə, facebook-dan ayrı qalmağın qiymətini 20% də artırıblar. Alimlər hesab edir ki, bunun səbəbi insanların özlərinə daha artıq qiymət verməsidir. Sosial şəbəkə aludəçiləri isə daha addiktiv olurlar.
Sağlamlığın və maddi vəziyyətin yaxşılaşmasından başqa, sosial şəbəkəyə fasilə verənlərin daha az xəbər oxumağa başladıqları da məlum olub. “Facebook-dan imtina xəbərlərin istehlakını da azaldır və istifadəçilər, şəbəkədən ayrı qaldıqları qısa müddətdə, onu başqa informasiya mənbələri ilə əvəzləmirlər”, – tədqiqatçılar yazır.
“(…) Tədqiqatın nəticələri ilə bütöv halda Experimental Economics jurnalında tanış olmaq olar”, – Daily Mail bildirir.
