Kaliforniya Universitetinin professoru Frank M. Mitloner (Davis, ABŞ) hesab edir ki, ətdən kütləvi imtina ətraf mühitə mənfi təsiri nəinki azaltmır, əksinə artırır. Onun məqaləsini Science Alert dərc edib.
Bir çox fəallar və ətraf mühit müdafiəçiləri, insanları daha az ət yeməyə, hətta ət məhsullarının istehlakını azaltmaq məqsədilə, hökumətləri əlavə rüsumlar tətbiq etməyə səsləyirlər. Onlar hesab edirlər ki, bununla ekoloji vəziyyəti düzəltmək və təbii ekosistemin yükünü azaltmaq mümkün olacaq. Arqumentlərdən biri isə budur ki, heyvandarlıq nəqliyyatdan daha çox parnik qazlarına səbəb olur. Lakin Mitloner, bu iddianı əsassız sayır.
Alim, ABŞ Ətraf Mühitin Mühafizəsi Agentliyinin məlumatlarına istinadən bildirir ki, parnik qazlarının antropogen tullantılarının yalnız 9 faizi kənd təsərrüfatının payına düşür. Liderlər isə bunlardır – elektrik enerjisi istehsalı (28 faiz), nəqliyyat (28 faiz) və ağır sənaye (22 faiz). Heyvandarlığın payına düşən isə, sadəcə 3.9 faizdir.
Ət və ət məhsulları istehsalının nəqliyyatdan artıq tullantılara malik olduğuna dair yanlış qənaət, BMT Ərzaq və Kənd Təsərrüfatı Təşkilatı tərəfindən, 2006-cı ildə nəşr olunan, heyvanların iqlimə təsirinin səhv qiymətləndirildiyi hesabatından sonra formalaşıb. Bu hesabatda ekspertlər, ət istehsalı ilə bağlı olan bütün faktorları, o cümlədən gübrə istehsalını və yabanı ekosistemlərin otlaqlara çevrilməsini də nəzərə almışdılar. Halbuki onlar, nəqliyyat vasitələrilə heyvandarlığı müqayisə edəndə, avtomobillər üçün ehtiyat hissələrinin istehsalını və yolların salınmasını heç nəzərə almamışdılar. Bu isə araşdırmanın nəticələrini təhrif edirdi.
Mitloner qeyd edir ki, hətta bütün amerikalılar heyvan məhsullarından imtina etsələr belə, onlar parnik qazlarının səviyyəsini yalnız 2,6 faiz azalda bilərlər. Eyni zamanda, yeni texnologiyaların tətbiqi 1961-ci ildən ət sənayesinin ətraf mühitə ümumi təsirini 11,3 faiz azaltmaqla yanaşı, ət istehsalını da iki dəfə artıb. Ətdən qlobal imtina, ərzaq təhlükəsizliyinə böyük zərbə vura bilər. Bitki əsaslı qidalar insanın kalori ehtiyacını ödəyə bilmir, çünki insan orqanizmi otyeyən canlılardan fərqli olaraq, lifi həzm etmək iqtidarında deyil. Bundan əlavə, heyvandarlıq təxminən bir milyard insanın dolanışığını təmin edir.
Dünyada vegetarianlığa kütləvi keçid olsa, yeni əkinçilik əraziləri tələb olunacaq. Dünyada isə torpağın yalnız 30 faizi, becərilən bitkilərin yetişdirilməsi üçün yararlıdır. 2050-ci ilə qədər Dünya əhalisi 9.8 milyarda çatacaq, bu vəziyyətdə isə, ətin istehlakı əkin sahələrinin genişləndirilməsindən daha az ətraf mühitə zərər verəcək.
