Finlandiya, Norveç, Rusiya və ABŞ-dan olan beynəlxalq alimlər qrupu belə bir qərara gəliblər ki, qlobal istiləşmədən və buzlaqların əriməsindən ötrü, növbəti 30 ildə şimal qütb regionlarında 70%-ə qədər infrastrukturun dağılması baş verə bilər. Bu haqda Phys.org saytının press-relizində deyilir.
Araşdırmaçıların qiymətləndirməsinə görə, 2050-ci ilə qədər buzlaqlarda yaşayan əhalinin təxminən dörddə üçü (3,6 milyon adam) kommunikasiya və binaların dağılmasından əziyyət çəkəcək. Məsələn, Alyaskada 547 km-lik hissəsi təhlükəli bölgələrdən keçən Transalyaska neft kəməri də təhlükə ilə üz-üzə qala bilər. Onun qırılması, neft məhsullarının axmasına və ekoloji faciələrə səbəb olacaq. Paris razılaşmasına nail olunsa da, arktik infrastrukturlar yenə də təhlükə altında qalmağa davam edəcəklər.