Rusiyada keçirilən Landşaft Memarlığı layihə yarışması başa çatdı.
Studio 44 və WEST 8, Rusiyanın Sankt-Peterburq şəhərində keçirilən Tuchkov Buyan Park Yarışmasında qalib gəldi.
Tuchkov Buyan Parkı üçün Memarlıq Landşaft Dizayn Konsepsiyası üzrə Beynəlxalq Müsabiqənin nəticələri açıqlandı. WEST 8 ilə konsorsiumda yer alan Studio 44-ün təklifi birinci, Herzog & de Meuron ilə konsorsiumda JV Vogt ikinci, KARAVAN konsersiumu ilə AB CHVOYA üçüncü yeri tutdu.
DOM.RF Fondu tərəfindən təşkil edilən və Strelka KB tərəfindən idarə olunan “Tuchkov Buyan Park Yarışması” ilk olaraq 2019-cu ilin sentyabr ayı ərzində Sankt-Peterburq Hökuməti tərəfindən təsis edildi. Bu müsabiqə vasitəsilə Tuchkov Buyan şəhərə birbaşa çaya çıxışı olan ilk park olacaqdı. Bu “süni müdaxilə” eyni zamanda şəhərin yaşıl sahələrinin vahid, fasiləsiz bir piyada marşrutu ilə birləşməsinə imkan verəcəkdir: Mars və Yay Bağlarından Trinity Meydanı və Alexandrovsky Parkına, ordan da adalara. Tuchkov ilə Akademik Lixaçov Meydanı arasındakı sahil də dəyişdiriləcəkdir.
Yarışda iştirak etmək üçün 50 ölkədən 229 komanda müraciət etdi, onlardan 8-i təklif hazırlamaq üçün seçildi. Münsiflər heyətində memarlıq, landşaft dizaynı və şəhərsalma sahələrində 14 beynəlxalq mütəxəssis təmsil olundu.
QALİB – Studio 44
Qalib konsept, romantik mənzərə görünüşləri yaratmağa və panoramik şəhər mənzərələrini təmin etməyə yönəldilmişdir. Gəzinti zamanı bir küncə dönəndə və ya bir təpəyə qalxanda qarşınızda hansı mənzərənin açılacağını təxmin etmək mümkün deyil. Belə sürpriz məkanlar yaratmaq landşaft memarlarının ən gözəl xüsusiyyətidir. Bura uzun gəzintilər və gündoğumunu və qürubları seyr etmək, dəyişən fəsillərə şahid olmaq, günəşin və ayın parıltısını izləmək üçün bir parkdır. Parkda canlı təbiətin cansız, ruhsuz şəhər həyatı ilə birləşdirildiyi müxtəlif yerlər də var.
İkinci yer – JV Vogt, Herzog & de Meuron ilə konsorsiumda
Bu konsept mənim daha çox xoşuma gəlmişdi, nə yalan deyim. Konsept ərazinin tarixi kimliyini vurğulayır. İştirakçılar ‘buyan’ sözünün mənasını mövcud olmayan bir nağıl mənzərəsi kimi təsvir edirlər: görünməz, əfsanəvi ada. Tarix boyu ərazinin relyefi hər zaman dəyişir. Malaya Neva ilə adanın bütün topoqrafik təbəqələrini birləşdirərək üst-üstə qoymaqla iştirakçılar keçmiş sahil xəttinin təbii xüsusiyyətlərini canlandıran bir vadinin konturlarını əldə etdilər. Bu vadi ‘buyan’ sözünün təcəssümüdür.
Üçüncü yer – AB CHVOYA, KARAVAN landskapsarkitekter ilə konsorsiumda
Parkın əsas məqsədi şəhərdə fasilə verib, dincəlməyə imkan yaratmaqdır. Mənzərədən zövq alaraq istirahət etmək və düşünmək üçün hazırlanmış sakit bir park təəssüratı yaradır. Bütün funksiyalar, məkanlar bu məqsəd üçün hazırlanmışdır. 20-ci əsrin ortalarına qədər bu yer şəhərin mərkəzində davamlı dəyişən mənzərə anomaliyası idi. Bir bataqlıq, bir yarımada ən nəhayət, Petroqradskaya Bölgəsinin bir hissəsi idi. Layihə ərazinin su ilə əlaqələrinin bütün tarixini əks etdirir. Bitkilərin bolluğu və çoxsaylı təbəqələr məkanı şəhərin tarixi və təbiəti ilə davamlı əlaqəli saxlayır.
Diqqət etdinizmi, bilmirəm. Əgər deyilsə, bir də yuxarıya baxın. Hər üç layihə özündə şəhərin tarixini, kimliyini, homogen əhalinin mədəniyyətini birləşdirməyi bacarmışdır. Ümumiyyətlə “şəhər kimliyi” landşaft memarlığında tabudur. Bu tabunu yıxmaq, onu heçə sayıb nəzərə almamaq proyektin qeyri-funksional işləməsinə gətirib çıxarır. Paytaxtımızda yeni salınan (gülmək smayliki) parkların əksəriyyətində bu problem çox gözə batır. Hər nə olur olsun, park olsun məqsədli salınan heç bir yeni proyektlərdə şəhərin kimliyi nəzərə alınmamışdır. Beləcə ortaya karikaturaya bənzər işlər (iş demək mümkünsə. Çünki iş müəyyən hədəfə xidmət etməlidir) çıxır. Bunun ən böyük səbəbi landşaft memarlığının gözardı edilməsi, “nə var ki, ağacdır, əkdin, fantandır, qoydun məsələ bitdi” zehniyyətidir. Ümid edirəm ki, bu qisim insanlar ən yaxın vaxtda məsul vəzifələrdən bir daha dönməmələri şərti ilə uzaqlaşdırılacaqdır. Şəhərin “brend” olması təkcə ticarət yollarının üstündə inşa edilməsi ilə deyil, onun həm də silueti və landşaftı ilə ölçülür.