Mayın 3-də Üzeyir Hacıbəyovun “Arşın mal alan” operettası Türkiyənin Sparta şəhərində, Süleyman Dəmirəl Universitetinin səhnəsində konsert versiyasında ifa ediləcək.
Bu haqda AzLogos-a tədbirin təşkilatçısı və dirijoru, Süleyman Dəmirəl Universitetinin dosenti, bəstəkar Əli Əlizadə məlumat verib. O deyib ki, bu əsərin Sparta şəhərində konsert premyerası olacaq, səhnədə ifaçılardan başqa iki deklamator da olmalıdır – onlar tamaşaçılara baş verənləri bir növ şərh edəcəklər.
“Komik hissələri olacaq bu deklamasiyaların” – Əli Əlizadə söhbətində qeyd edib – “Məsələn, dinləyicilərə müraciətlə deyiləcək ki, baxın bu Əsgər evlənmək istəyir, amma o zaman WhapsApp yox, Messenger yox, sosial şəbəkələr yox, qızın fotosu yox, bəs o nə etməlidir, necə tanısın qızı?” kimi şərhləri olacaq səhnədəki deklamatorların.
Əsəri Universitetin müəllim heyətindən ibarət kamera orkestri ifa edəcək, solistlər isə bütün Türkiyədən, müxtəlif opera teatrlarından dəvət edilmişdirlər. Əsgər rolunu Vokalçıların Bülbül adına Beynəlxalq Müsabiqəsinin laureatı tenor Ömer Türkmenoğlu, Gülçöhrə rolunu isə Antalya Dövlət Opera və Balet Teatrının solisti, sopranoçu Nuray Çevikere ifa edəcəklər.
Əli Əlizadə söhbətində onu da vurğulayıb ki, 3 may ölməz bəstəkarımız, Azərbaycan musiqisinin klassiki Aqşin Əlizadənin (1937-2014) vəfatı günüdür və bu onun çox-çox sevdiyi bu əsərin premyerasını atasının işıqlı xatirəsinə ithaf edir.
Üzeyir Hacıbəyovun üçüncü və sonuncu musiqili komediyası olan “Arşın mal alan” operettası 1913-cü ildə bəstəkar tərəfindən qələmə alınmış və o zamandan müstəsna bir uğurla dünyanın bir çox teatrlarında səhnələşdirilmişdir. Operetta yazıldığı andan bir çox dillərə çevrilmiş, 5 dəfə filmləşdirilmişdir. Əsərin 1945-ci ildə lentə alınmış versiyasi 86 dilə dublyaj edilmiş və 136 ölkədə nümayiş etdirilmişdir.
Səhifəmizdə hər hansı səhv və ya qeyri-dəqiq məlumat gördükdə, həmin mətni seçib Ctrl+Enter düymələrini sıxaraq bu barədə bizə məlumat verməyinizi xahiş edirik.
