2014-cü ilin bu günlərində, Kiyevdə yaşanan hadisələr Avropanın XXI əsrdə gördüyü ən qanlı tarix idi. Kiyev yeni əsrdə bir neçə dəfə hakimiyyətə qarşı çıxışların mərkəzinə çevrilmişdi, amma belə bir qanlı toqquşmanın şahidi olmamışdı.
Həmin hadisələr zamanı, xüsusən də fevral ayının 20-21-də hakimiyyətə və onun Rusiya meylli siyasi kursuna qarşı çıxan dinc və müəyyən qədər qeyri-dinc nümayişçilərə qarşı xüsusi təyinatlı «Berkut»-un açdığı atəş nəticəsində 100-dən artıq nümayişçi qətlə yetirildi. Hadisə zamanı çəkilmiş videolar tükürpədici idi. «Maydan» meydanının yaxınlığındakı binaların, mehmanxanaların hündür mərtəbələrindən açılan Snayper güllələri nümayişçiləri yerə sərirdi. Haşiyə çıxaraq bunu deyim ki, «Maydan»-da və ətrafındakı nümayişçilərə atılan güllələrin hansı qüvvələr tərəfindən atılması ilə bağlı bir çox fərziyyələr ortalıqda dolaşdı. Ümumi yayılan məlumata görə bu qətliam hökumət qüvvələri və xüsusən də «Berkut» tərəfindən hayata keçirilmişdi. Amma bunun «Qərb meyilli qüvvələr» tərəfindən hadisələrin daha da qızışdırılması niyyəti ilə həyata keçirildiyini iddia edənlər də az deyildi.
Nəticə isə dəyişilməzdir: Onlarla insan qətlə yetirildi, yüzlərlə insan yaralandı, hakimiyyət dəyişildi, ölkənin bəzi hissələri ölkədən «ayrıldı», hələ də davam edən separatistlərlə toqquşma və ən əsası insanların yaşadığı böyük travma…
Həmin hadisələr zamanı çəkdiyim fotoları sizə təqdim edirəm. Bu fotoların bəziləri həmin hadisələr zamanı Azadlıq Radiosunda yayılmışdır.
Abbas Atilay
