İsveçrənin Bern şəhərində Tarix Muzeyi tərkibində, XIX-XX əsrlərdə yaşamış məşhur İsveçrə səyyahı, kolleksioner və saat ticarəti firmaları ilə məşhur Henri Moserin Qacar Xanədanlığı dövrünə aid topladığı kolleksiyasının sərgisi açılıb. Sərgidə H. Moserin 23 yaşından başlayaraq Mərkəzi Asiya, indiki İran, Çar Rusiyası və Osmanlı torpaqlarından topladığı Qacar sülaləsinin hakimiyyəti vaxtlarına təsadüf edən və onlarla bağlı olan əşyalar sərgilənir.
Hər şeydən öncə, əziz oxuculara olduqca maraqlı həyat tərzi olan Henri Moser ilə bağlı müəyyən məlumatları tapıb oxumağı məsləhət görürəm. Kifayət qədər varlı ailədən gələn bu şəxs Osmanlı və Qacar xanədanlığı dövrünə aid topladığı eksponatlarla hörmət qazanıb…
Haqqında danışdığımız kolleksiya əslində muzeydə müvəqqəti nümayiş etdirilir. Kolleksiya mütəmadi olaraq müxtəlif ölkələrdə, fərqli şəhərlərdə sərgilənir. Burda bir haşiyə çıxmaq istərdim: Tariximizin bir hissəsi olan Qacar xanədanlığına aid Azərbaycan Tarix Müzeyində nələr var? Belə sərgilərin Azərbaycan muzeylərində sərgilənməsi və geniş reklam işi aparıb insanlarda muzeylərə həvəs yaradılması çox faydalı olmazmı? Mən inanıram ki, bu sərgilər nəinki bu sahənin mütəxəssislərini, hətta sadə insanların da marağını cəlb edə bilər…
Muzeydə Qacar Sülaləsi dövrünə aid xeyli materiallar nümayiş etdirilir: Dövrün saray otaqlarının dizaynından tutmuş, tibbi alətlərə, dərviş geyimlərindən zirehli dəbilqə və silahlara qədər bir çox diqqət çəkən detallar var.
Muzeydə məni narahat edən bir detalı da sizinlə bölüşüm: Tarix Muzeyinin Qacarlar Sülaləsi dövrünə aid eksponatların sərgiləndiyi salonun girişinə ingilis, fransız və alman dillərində “Perslərin (farslar) qəbul otağı” yazılıb. Bir sülaləyə aid nadir və antik əşyaları nümayiş etdirən bir qrum görən doğrudanmı Qacar sülaləsinin fars mənşəli olduğunu düşünür? Qərb dünyasında bu Pers sevgisi görən niyə bu qədər ifratdır? Buna baxmayaraq Muzeydə bu əşyalar arasında çox gözəl zaman keçirəcəyinizə inanaraq fotoları sizin üçün çəkdim. Xoş istirahətlər.
