Hörmətli vətəndaşlar, əziz dostlar, hamınızı təbrik edirik, Bakı şəhərində dünyanın ən böyük şadlıq evi olan “Zumray Palace” açılıb!
Böyük olması təbiidir, axı bir zamanlar, yəni keçən əsrin 70-ci illərinin sonunda inşa edilmiş bu 10000 kv. metr artıq sahəyə malik bina Bakının fəxri olan Yüngül atletika maneji idi. Bina 1970-80-cı illərin sovet modernizmi memarlığının abidəsidir. Layihənin müəllifi Azərbaycan tarixində ölkənin ilk əməkdar qadın-memarı, Xarici İşlər Nazirliyinin hazırkı binasının, “Bakı soveti” metro stansiyasının, dəmiryol vağzalının binalarının müəllifi istedadlı Zeynəb xanım Quliyeva idi…
Onu tanıyanlar mənə danışırdılar ki, Zeynəb xanım əzmkar, sarsılmaz və düz xasiyyətli əsl peşəkar idi. Məhz buna görə indiki dayaz qəlbli “memarlıq” məmurları indi ondan qisas alırlar. Onların dinməz-söyləməz razılığı ilə Xarici İşlər Nazirliyinin və dəmiryol vağzalının binalarına eybəcər üzlük vuruldu və “Bakı soveti” metro stansiyası yerlə yeksan edildi. İndi isə yeni bir mənasız və kədər doğurucu bir “nailiyyət”: Yüngül atletika maneji əvəzinə “Zumray Palace”…
Elçin Əliyev
“Bakının 1920-1930-cu illər konstruktivizm dövrü memarlığı” kitabının müəllifi,
Sənətşünaslıq üzrə elmlər doktoru, professor
