Rusiya sülhməramlılarının 9 May Qələbə günü münasibətiylə, nəzarətlərindəki ərazidə keçirməyi nəzərdə tutduqları parada qədər, Xocavənddə antisovet qüvvələrinin əlaltısı Q. Njdeyə qoyulmuş abidəni demontaj etməyi ermənilərdən tələb ediblər.
Məhz tələb adlandıra biləcəyimiz bu çağırışın njdeistləri möhkəm əsəbiləşdirdiyi, abidənin üzərinə “этовамнеармавир” heşteqli plakatın asılmasından bəlli olur. Bununla, ermənilər rus hərbçilərinə “buranın” Rusiya ərazisindəki Armavir olmadığına eyham vururlar. Xatırladaq ki, hərbi cani Q.Njdeyə Armavir şəhərində qoyulmuş abidə yerli kommunist aktivistlərin müdaxiləsi və tələbi ilə sökülmüşdü. Yəni, “Armavir Rusiyanın ərazisidir, orada sözünüz keçir, abidəni sökürsünüz, bura isə Armavir deyil, burada sözünüz keçmir…”.
Doğrudan da maraqlı, dalan situasiya yaranıb; əsəblər, iradələr meydana düşüb gərdiş etməkdədir, incə, fəqət yoğun mətləblərə aparan maraqlar toqquşub, əks prinsiplərə arxalanmış tərsliklər kəllə-kəlləyə gəlib. İndi, ya gərək njdeistlər geriyə addım atıb “tanrı”larına ucaltdıqları bütü sökələr, ya da gərək sülhməramlılar öz “pozisiyaları”ndan geri çəkilib, faşizm üzərində qələbənin ildönümü paradını nasist əlaltısının abidəsi kölgəsində gerçəkləşdirələr… Birbaşa kölgəsində olmasa belə, sənin nasizm üzərində qələbə paradı keçirdiyin ərazinin qonşuluğunda, nisbətən yaxınlıqda antitezisinə abidə ucalır. Siyasi karikatura deyilmi?
Qərəz, hər iki halda siyasi-ideoloji tənəzzül, geriyə addım atma, qabağındanyemə müşahidə olunacaq, parlaq hadisələr vücuda gələcək. “Günəş eynəklərimizi” taxıb göylərə baxaq: gün tutulması yaxındır.