Ucal Haqverdiyev — müstəsna bir rəssam və təsəvvürə gəlməz bir şəxsiyyət…
15 il öncə bizi əbədi tərk etdi. Dostlar arasında zarafatla “İsus” ləqəbi qoyduğumuz rəssam, ömrünün son illərində könüllü olaraq Bakıdakı Mixail Arxangel kilsəsinin bədii tərtibatı ilə məşğul idi. O üzdən onun misilsiz mirası yalnız tablolarında deyir, bir hissəsi həmin kilsənin divarlarında qaldı.
Ucal Haqverdiyev 1960-cı il 9 iyunda Bakı şəhərində, rəssam Həsən Haqverdiyevin ailəsində dünyaya göz açıb. Uşaqlığından istedadlı Ucalın rəsmləri «Azərbaycan Təbiəti» jurnalında çap olunur, elə həmin illərdə (1975-79) gələcək rəssam Əzim Əzimzadə adına Rəssamlıq məktəbində oxuyurdu. Daha sonra, 1979-da Tallində İncəsənət İnstitutuna qəbul olsa da, Ucal təhsilini davam etdirmir. 1985-ci ildə Rəssamlar İttifaqının nəzdində gənc rəssamlar birliyinə daxil olur və 1987-ci ildən ümumittifaq və respublika sərgilərində iştirak etməyə başlayır. Həmin ildə Ucal öz seçimi ilə ortodoks (pravoslav) xristian olur, kilsədə xaç suyuna salınaraq, dini Pyotr adını alır.
Rəssam 1988-1991-ci illərdə SSRİ Rəssamlıq Akademiyasının təqaüdçüsü olub, akademiyanın hesabat sərgilərində iştirak edib. 1992-98-ci illərdə Avstriya, Almaniya və Azərbaycanda keçirilən beynəlxalq simpoziumların iştirakçısı olub. 1997-ci ildə Azərbaycan Rəssamlar İttifaqının üzvlüyünə qəbul edilib. «Labirint» qrupunun yaradılmasında iştirak edib. 2000-ci ildə «Labirint» qrupunun tərkibində, «Humay» mükafatına layiq görülüb. 2004-cü ilin qışında əbədiyyətə qovuşub…
Rəssamın əsərləri ABŞ, Almaniya, Avstriya, Fransa, Norveç və Türkiyədə müxtəlif sərgi salonlarında nümayiş etdirilib.
