Azərbaycanlı gənc hüquqşünas və İT sahəsində mütəxəssis Samir Əliyev İsveçrədə «Swiss Cyber Institute» – kibertəhlükəsizlik üzrə tədris mərkəzinin rəhbəridir.
Fəaliyyət göstərdiyi bu üç il ərzində mərkəz daha da böyüyərək, 15 mütəxəssisi bir araya gətirib, İsveçrə Təhsil Komitəsində rəsmi qeydiyyatdadır və İT və onunla əlaqəli istiqamətlərdə mütəxəssislər üçün təlim kursları təqdim edir.
Mərkəzin açılmasından dərhal sonra pandemiya ilə bağlı çətinliklər yarandığı üçün layihənin hədəfləri zamanın reallıqlarına uyğunlaşdırılmalı oldu. Bu zaman kiber təhlükəsizlik sahəsində diqqətin daha çox onlayn təlimlərə verilməsi qərarı alındı və bu uğurla həyata keçirildi.
“Hazırda Mərkəzimiz İsveçrədə kibertəhlükəsizlik sahəsində onlayn formatda təhsil təqdim edən yeganə mərkəzdir”, – deyə onun təsisçisi Samir Əliyev bu haqda qürurla danışır.
Lakin bu uğur asan əldə olunmayıb və onun arxasında uzun illərin mübarizəsi dayanır.
Samir Əliyevin sözlərinə görə, o, 1985-ci ildə Azərbaycanın Şəmkir rayonunda sadə ailədə anadan olub. 16 yaşınadək, yəni məktəbi bitirənədək burada yaşayıb. Böyük ambisiyalar, inkişaf və böyük məqsədlərə nail olmaq arzusu onu əvvəlcə hüquqşünaslıq sahəsində ali təhsil aldığı Bakıya, sonra isə hüquq sahəsində magistratura təhsilini alması üçün Ankaraya gətirib çıxarır.
Öz ideyalarını doğma ölkəsində gerçəkləşdirməyə imkan tapmayan Samir 2016-cı ildə 31 yaşında öz bəxtini Avropada sınamağa qərar verir və bunu bacarır. Sürixdə Alman dili kurslarına yazıldıqdan sonra Sürix Universitetinə daxil olur, sonra isə ali məktəbi də bitirərək diplomlarının siyahısına daha birini əlavə edir və burada qalmaq qərarına gəlir.
Hüquq sahəsində əmək bazarında rəqabətin son dərəcə yüksək olduğunu dərk edən gənc rəqiblərin arasında üstünlük əldə etmək üçün öz peşəkar biliklərini əlavə bacarıq və biliklərlə artırmaq lazım olduğunu düşünür.
Beləliklə, Samirin seçimi kibertəhlükəsizlik sahəsinə, yəni virtual məkanda təhlükələrdən qorunmanın üzərinə düşür, çünki rəqəmsallaşmanı gələcəyin tendensiyası hesab edir. Bu qərar onu Harvard universitetinə gətirib çıxarır, burada o, xüsusi təlim kursu keçir və kibertəhlükələrə qarşı müdafiə sahəsində sertifikatlaşdırılmış mütəxəssis olur.
Bu gün Samir Əliyev “İsveçrə Cyber Institute” Mərkəzini uğurla idarə edir, Həmçinin İsveçrə hüquqşünaslarına dərs dediyi Sankt-Qallen Universitetində rəhbərlərin kiber təhlükəsizlik sahəsində iki təlim proqramına rəhbərlik edir.
Samir Əliyev Kibertəhlükəsizlik Tədris Mərkəzinin uğurlu inkişafını nisbətən qısa müddətdə praqmatik yanaşma səbəbindən olduğunu hesab edir. Onun sözlərinə görə, burada nəzəriyyəyə deyil, praktikaya əsaslanan biliklər verilir ki, bu da məzunlara həmin bilikləri gündəlik işlərində uğurla tətbiq etməyə zəmanət verir.
Samir Əliyev İsveçrədə təmsil olunan dünyanın aparıcı şirkətlərinin etimadını qazanmağı bacardığı və onların öz işçilərini «Swiss Cyber Institute» mərkəzinə hazırlığa inamla göndərdikləri üçün fəxr edir. Bununla yanaşı ölkənin hökumət institutları ilə də əməkdaşlıqlar qurulub.
«Google, Huawei, FIFA, Credi Swiss, UBS kimi dünyanın nəhəng şirkətləri öz tələbələrini bizə yönləndirir, həmçinin Sürixin iki ən prestijli universiteti də öz işçilərini bizə göndərirlər», – deyə, o 1news.az-a öz müsahibəsində dildirib.
Samir Əliyevin planlarına 2022 -ci ilə öz Mərkəzinin əməkdaşlarının sayını 20 nəfərə çatdırmaq, gələn ildən Avropa çərçivəsində fəaliyyətini genişləndirmək, yaxın beş il ərzində isə mərkəzin məzunlarının sayını 10 minə çatdırmaq daxildir.
Yelena Ostapenko
1news.az-dan tərcümə
