Ermənistanın ikinci prezidenti, hərbi cinayətkar Robert Köçəryan “5-ci kanal” adlı erməni telekanalına müsahibə verib. Köçəryan sözügedən müsahibəsində öz həmvətənlərinin beyninə aşağıdakı ideyanı yeritməyə çalışıb – guya müharibənin başlamasına öz iyrənc, təxribatçı fəaliyyəti ilə məhz Paşinyan səbəb olub:
“Mən əminəm ki, hökumət müharibəni qaçılmaz etməkdən ötrü əlindən gələni elədi”.
Bu yerdə o, Ermənistanın keçmiş müdafiə naziri, qlamur David Tonoyanın “yeni ərazilər”in tutulması ilə bağlı sözlərini də xatırladır.
Lakin… Köçəryan həm də gözlənilmədən, ermənilərin təxribat saxtakarlıqlarını tamamilə darmadağın edir: “Hər şey erməni tərəfin iyul ayında Tovuz sərhədində münaqişə yaratmaq cəhdi ilə başladı!”. Daha sonra o, əlavə edir: “Bir ay ondan əvvəl Baş Qərargahın başçısının, Ermənistanın müharibəyə hazır olmadığı ilə bağlı məruzəsini nəzərə alsaq, bu, yolverilməz bir səhv idi.”
Yəni Köçəryan, iyul münaqişəsini təhrik edən tərəfin Yerevan olduğunu etiraf edir və təsdiqləyir.
Elə bilirsiniz, bundan sonra ermənilər peşman olub üzr istəyəcəklər? Axı, iyul hadisələrindən sonra Tovuz döyüşlərinin başlanmasında onlar məhz bizi – Azərbaycanı ittiham edirdilər!
Yəni onların hamısı – erməni KİV-ləri, cəmiyyəti, blogerləri, xaricdə bizim səfirliklərə soxulmağa, həmvətənlərimizə hücum etməyə çalışan, ancaq cavablarını alıb polisə şikayət edən diaspora təlxəkləri, rus və əcnəbi KİV-lərinin satın alınmış oyuncaqları (Solovyov, Zatulin, Peqov və digərləri) rus, xüsusilə də, fransız diplomatları – bizdən üzr istəyəcəkmi? Axı, artıq aydındır ki, Paşinyan hərbi əməliyyatları Ermənistanın ərazisinə keçirməyə və KTMT-ni müharibəyə cəlb etməyə çalışırdı.
Yox, üzr istəməyəcəklər. Çünki həyasız və utanmazdırlar. Amma eybi yox. Onsuz da tarix hər şeyi yerbəyer edəcək. Çevriliş nəticəsində Ermənistanda başqa quldurlar hakimiyyətə gələndə (fikir verin, orada heç bir prezident hakimiyyətə çevrilişsiz, qansız, dürüst seçkilər sayəsində gəlib-getməyib), biz payızda baş verən müharibə ilə bağlı çoxlu başqa təfərrüatlar da öyrənəcəyik. Ən əsası da – bu müharibədə ölən minlərlə erməni (təxminən, 9000-10000), uğursuz, pis hazırlanmış əməliyyatlar barədə (Cəbrayıldakı əks-hücum haqqında Paşinyan özü Feysbuk səhifəsində və digər sosial şəbəkələrdə məlumat vermişdi) eşidəcəyik.
Yeri gəlmişkən, Paşinyana daha çox zərbə vurmaq istəyən Köçəryan, erməni hökumətinin daha bir səhvi qismində “səmanı düşmən dronları üçün bağlaya bilmədiklərini” göstərir. O, deyir ki, dövlət məmurlarına mükafat kimi verilən 120 milyon dollara bir neçə müasir müdafiə vasitələri almaq mümkün idi.
Hərçənd, burada Robert əsl əclaf kimi davranır. Düz də eləyir! Öz dəbdəbəli sarayının terrasında oturub, üzünü, kürəyini massaj etdirə-etdirə, qəşəng səhər yeməyi yeyə-yeyə, Avropadan gətirtdiyi mütəxəssisə dırnaqlarını manikürlədərək, rahat-rahat, təkəbbürlə, ironiya ilə ermənilərin beyinlərini doldurur.
Serj Sarkisyanla Robert Köçəryan Ermənistanın ən varlı adamlarıdır, ölkədəki bütün biznesi bölüşdürüblər, hər şeyi çapıb-talayıblar. Bütün sahələrdə. Hətta orduda da. İlk növbədə orduda: dəbilqələri, betonu, tankları, HHM sistemlərini, raketləri, əsgər corablarını, azuqələri – hər şeyi! Payız müharibəsinin əsas günahkarları – Robert Köçəryan, Serj Sarkisyan və onların komandalarıdır, amma onlar özlərini qorumaq üçün məğlubiyyətdə təkcə Paşinyanın komandasını təqsirləndirəcəklər.
Nə deyə bilərik?! Kaş erməni cəmiyyəti bu vəziyyətə düşməyəydi. Təəssüf ki, bu, hələ son deyil.
Elxan Mirzəyev