Bakıdan bir dostum, mənə Aleksandr Nevzorovun videosunun linkini atıb, fikrimi soruşur. Yaradıcının varlığına inanan dostum, Mütləqə çıxış kanalı kimi islamı seçib, amma intellekti, analitik zəkası, mütaliəsi imkan verir ki, hər şeyi çox yaxşı başa düşsün, odur ki, müstəsna dünyəvi adamdır, hətta sekulyar dövlətin əbədiliyi uğruna vuruşmağa da hazırdır. Allah və onunla münasibətlər isə, özünün də dediyi kimi, hərənin «şəxsi işi»dir.
Qayıdaq Nevzorova. İstəyən, əvvəl bu qısa videoya baxsın. Rusca bilməyənlər isə yazıya davam etsinlər.
Nevzorov burada müsəlmanları bəşəriyyətin «нахлебник»-i adlandırır. Bizim dillə desək – ortada yeyib qıraqda gəzən, özgə hesabına dolananlar. Diqqət edin, burada iqtisadiyyatdan getmir söhbət. Elmə, tərəqqiyə töhfə verməyən «müsəlmanların», elm və tərəqqinin nemətlərindən faydalanmasından danışılır. Əsas tezis budur ki, «müsəlmanların cəmi iki Nobel mükafatçısı var. Bəşəriyyətə heç bir yararları yoxdur».
Bu, Nevzorova islam haqqında verilən ilk sual deyil. Tez-tez soruşurlar ki, «sən bizim pravoslavlığı, ümumiyyətlə xristianlığı hər gün təhqir edirsən, din xadimlərini ələ salırsan, bəs islam haqqında niyə danışmırsan? Çünki müsəlmanlar bizim kimi tolerant deyillər, səni yaxınlıqdakı bir döngədə və ilk fürsətdə bıçaqlayarlar…»
Nevzorovun adətən cavabı belə olur ki, «əl çəkin məndən, mən pravoslavlıq üzrə master-əm. Bu, mənim işim, bildiyim sahədir. İslam haqda isə heç nə bilmirəm. Gedin islamı bilən bir islam tənqidçisi tapın…»
Əlbəttə, Nevzorov burada biclik edir, özü də yaxşı bilir ki, opponentləri haqlıdırlar və onun pravoslavlığı tənqid etdiyi kimi, kimsə çıxıb islamı tənqid etsə, onu doğrudan da bıçaqlayarlar. Bizdə Rafiq Tağını bıçaqladılar. İndiyə kimi də qatillər azadlıqdadır. Türkiyədə Turan Dursunu güllələdilər. Ərəb ölkələrindən tez-tez xəbərlər gəlir ki, hansısa mürtədi, ateisti edam etdilər.
Təhqir etmək sənətdir. İncəsənətdir. Nevzorov da bu sənətin içində ərimiş adamdır. «Gedin islamı tənqid edəni tapın» demək, həm də bir təhqirdir. Təkəbbürlə deyilmiş çox incə təhqirdir. «İslam dünyasının lideri», «qadınlara səs hüququnu hamıdan qabaq verdik», «Molla Nəsrəddin jurnalı», «opera» – yaxşı basıb-bağlamağımız var. Bizim ölkədə Rafiq Tağını öldürdülər. Nevzorovun dediyi naxlebnik-lərdən biri də bizim xalqdır. Biz də çox həvəsli deyilik verməyə, almağa isə həmişə hazırıq. Bacardığımız budur. Nankorluğumuz da öz yerində.
Dostuma dedim ki, heç müsəlmanlar Nevzorovun dediyinə təhqir kimi də baxmırlar. Onlar üçün bu, normadır, belə də olmalıdır. «Cəhənnəmdə yanacaq olan kafirlər, bu dünyada biz müsəlmanların xidmətində dayanıblar, onlar işləyir, biz isə yeyirik, istifadə edirik».
Bu təsəllinin əsas provayderləri olan körfəz ölkələrinin rəqqasə göbəyi yalayan şeyxləri, nahaq elə düşünürlər ki, bütün müsəlman ümməti min bir gecə nağıllarında yaşayır. Əksəriyyəti acdır və kafirlərin işləyib hazırladıqları nemətlərdən yararlana bilmirlər. Bütün dünya müsəlmanları hər il toplaşıb gedirlər Amerikadan silah alıb, din qardaşı Yəmənin başına atan dövləti ziyarətə. Meydanda baş kəsən, səfirlikdə adam doğrayan, Məkkə-Mədinə torpağı, islamın döyünən qəlbi, nəhayət anqlosaks layihəsi – Səudiyyə Ərəbistanına.
Azərbaycanlılar üçün, ermənilər demişkən «variant çka» – yəni variant yoxdur. Biz bundan sonra nə qədər dibə yuvarlansaq da, uzağı Türkmənistan ola bilərik. Heç ola da bilmərik. Söhbət də ondan gedir ki, o yetimlərin günahı Xəzərin o tayında qalmalarıdır. Türkmənlər – min il əvvəlin bizləridir. Onlar bizim orijinalımızdır. Gülmək lazım deyil, biz Xəzərin bu tayına gəlməsəydik, indi biz də orda Qurbanqulunun mahnılarına qol qaldırıb oynayır, gitarasını öpürdük.
Yəni mənası yoxdur oyun çıxartmağın, Türkmənistana çata bilməyəcəyik, yarımçıq hamiləlik isə olmur. Ya o yanlıq, ya bu yanlıq olmaq lazımdır. İnsanlara düzgün vektor göstərilməlidir, bu vektor tərəqqiyə olmalıdır, yoxsa bu işlərin sonu çox pis qurtaracaq.
Ölkədə son iyirmi-otuz ildə, heç nə bacaramayan, əlindən iş gəlməyən nəhəng bir ordu yetişib. İyirmi beş, otuz yaşı var, heç nə bacarmır, pulu yoxdur. Bu adam məscidin qapısından keçməsin neynəsin? Mütləq keçəcək.