Teymur Rəcəbovun ardınca Nicat Abbasov da şahmat üzrə milli komandanın heyətində Avropa çempionatında çıxış etməkdən imtina edib.
Hər iki qrossmeyster bunu yorğunluqla əlaqələndirib.
Milliyə dəvət almaması müzakirələrə səbəb olan Abbasovun imtinası birmənalı qarşılanmayıb.
Çünki Avropa Çempionatı üçün heyət açıqlanarkən Nicatdan daha yaşlı olan, üstəlik Azərbaycanla heç bir bağlılığı olmayan milliləşdirilmiş Arkadi Naydiçin siyahıda yer alması, Abbasovun isə kənarda qalması geniş rezonans doğurdu.
Son vaxtlar yaxşı formada olan, millidə oynamağa haqqı çatan qrossmeysterin hansı süni əngəllər vasitəsilə kənarda saxlanması müzakirə edildi.
Mümkündür ki, Teymur Rəcəbovun imtinasından sonra çarəsiz qaldıqları üçün dəvət olunmaq Nicatın xoşuna gəlməsin.
Amma bu, sadəcə fərziyyədir.
Məsələnin digər tərəfindən baxsaq, gənc şahmat ustasının İsveçrədə çox güc itirdiyi bəllidir.
Abbasovun “Gran Swiss Tournament 2019″da 11 oyundan sonra 6.5 xal toplaması və 154 iştirakçı arasında 15-ci yeri tutması uğurlu nəticə hesab edilə bilər.
Nəzərə alsaq ki, onu “ilk onluq”dan cəmi 0.5, liderdən isə 1.5 xal ayırır, deməli, turnir kifayət qədər gərgin və maraqlı keçib.
Nicat iki gün öncə başa çatan turnirdən sonra bir az istirahətə ehtiyac duymuş da ola bilər.
Yığmamızın heyəti aşağıdakı kimi olacaq:
Şəhriyar Məmmədyarov, Arkadi Naydiç, Rauf Məmmədov, Qədir Hüseynov, Eltac Səfərli.
Eltac əvvəlcə kapitan kimi elan olunsa da, heyətdəki itkilərin fonunda oynamağa məcburdu.
Düzdü, Şəhriyar Məmmədyarov öz sosial şəbəkə statusunda onu oynayan kapitan kimi təqdim etsə də, kapitan böyük ehtimalla, qadınlardan ibarət milli komandamızda olduğu kimi, Fikrət Sideyifzadə olacaq.
Ümumilikdə isə düşünürəm ki, bu, bəlkə də izləyəcəyim ən zəif AÇ-lərdən biri ola bilər.
Çünki qitə birinciliyində dünya şahmatının liderləri hesab edilən Maqnus Karlsen (Norveç), Sergey Karyakin (Rusiya), Maksim Vaşye-Laqrav (Fransa), Levon Aronyan (Ermənistan) kimi ustalar müxtəlif səbəblərdən öz ölkələrinin şərəfini qorumayacaqlar.
Ancaq bunun turnirin ümumi gedişatına nə dərəcədə təsir edəcəyi qarşıdakı günlərdə bəlli olacaq.
Yığmamız ilk oyununa bu gün çıxacaq. Saat 15:00-da start götürəcək oyunda rəqibimiz Serbiya millisi olacaq.
Birinci masada Şəhriyar Məmmədyarov, sonrakı yerlərdə isə uyğun olaraq Arkadi Naydiç, Rauf Məmmədov və Qədir Hüseynov mübarizə aparacaqlar.
Şəhriyar və Rauf qara Naydiç və Qədir isə ağ fiqurlarla oynayacaqlar.
Yarışın ümumi gedişi və olarsa, maraqlı hadisələr barəsində növbəti günlərdə məlumat veriləcək.
