Dostum, rəhmətlik Mövlud Mövlud o vaxt Əbülfəz Elçibəy haqqında “İsanı Qolqofaya aparanlar” adlı məqalə yazmışdı.
Saytların birində yayımlandı. Yadıma gəlir, o yazıdan sonra Mövluda böyük təzyiqlər oldu, çoxlu xahiş-minnət etdilər ki, silinsin. Çox dəhşətli söhbətlər var idi o yazıda.
Təxmini məğzi belə idi ki, 90-cı illərin sonlarında öz mətbuat orqanlarında Elçibəyi sərt tənqid, hətta təhqir edənlər sonradan onun müdafiəçisinə, xeyirxahına çevrilmişdilər.
Adlarla, faktlarla, yazıların, məqalələrin tarixinə kimi dəqiqliklə yazmışdı Mövlud.
Sonradan internetdə çox axtardım, tapa bilmədim həmin yazını…
Silmişdilər hər yerdən, yox etmişdilər…
Yaxın keçmişdə, ötən ilin bugünlərində milli komandamızın Millətlər Liqasındakı uğursuz çıxışından sonra təkcə Qurban Qurbanovun hədəf alınması, “mütəxəssislər”in, veteranların dil açması, “qaquliklər”in adama qarşı aşkar hücumlarını xatırlayıb həmin yazının məğzi düşdü yadıma.
Qurbanovu “Qolqofaya aparırdılar”. Göz görə-görə, utanmadan.
Apardılar, edam da etdilər. Bu “edam” bəlkə də Qurban Qurbanov üçün xilas oldu, bəlkə də cəza, bu başqa söhbətin mövzusudur, amma onu bu yola itələyənlər, güllə qabağına, dar ağacına çəkənlər sonra peşman oldular.
Hətta İsanı edam edənlərdən daha çox peşman oldular.
Bu gün isə həmin adamlar 24 il sonra seçmə mərhələni yenidən 1 xalla, rüsvay, biabır, əzik və məhv olmuş şəkildə başa vurmuş milli komandada yeni günahkar axtarışına çıxıblar.
Yeni hədəfləri də var. Futbolçular, baş məşqçi, komandanın təchizatçısı, avtobusun sürücüsü, nə bilim şam tutan, ağac sulayan, bir sözlə dəxli oldu, olmadı, hamı günahkardı. Əsas səbəbkarlar isə yenə ortada yeyib qıraqda gəzirlər…
Böyük ehtimalla, onsuz da müqaviləsi gələn ilin əvvəlində başa çatacaq Nikola Yurçeviç millinin baş məşqçi postundan göndəriləcək. Onun yerinə kimsə təyin olunacaq. Əlimizə təzə oyuncaq, ağzımıza təzə saqqız, klaviaturamıza isə təzə mövzu verəcəklər. Oynayaq, çeynəyək və yazaq deyə.
“İsanı Qolqofaya aparanlar” isə yenə çəpik çalacaqlar, ağalarının sözü ilə, onların icazə verdikləri qədər tənqid edib, onların dediyi adamları dar ağacına çəkəcəklər.
Balıq isə başdan iylənər… Başdakı dəyişmədikcə Azərbaycan futbolunda heç nə yaxşı olmayacaq.
AFFA rəhbərliyi, konkret Elxan Məmmədov və onun yarıtmaz dəstəsi əllərini Azərbaycan futbolundan çəkmədikcə heç nə yaxşı olmayacaq.
Çox Qurbanlar, Yurçeviçlər, Əlilər, Vəlilər, Əhmədlər, Məmmədlər gələcək, gedəcək, tənqid olunacaq, amma heç nə dəyişməyəcək.
Ölkə prezidentinin qəbul etdiyi “2005-2015-ci illərdə Futbolun İnkişafına dair dövlət proqramı”nın nəticəsi 24 il sonra 1 xal olmamalı idi.
Tsiklə oyunlarından bəziləri Azərbaycanda keçiriləcək AVRO-2020-yə yüksəlmək hədəfi ilə başlayan yığmanın yekun nəticəsi bu olmamalı idi…
Heç bir şey bu şəkildə bərbad olmamalı idi…
Hər şey daha yaxşı ola bilərdi, əgər daha yaxşı olmağını istəsəydilər…
Səhifəmizdə hər hansı səhv və ya qeyri-dəqiq məlumat gördükdə, həmin mətni seçib Ctrl+Enter düymələrini sıxaraq bu barədə bizə məlumat verməyinizi xahiş edirik.
