Kremlin Qarabağa görə “üçüncü cəbhə” açmağa cəsarəti və gücü yetməyəcək
“Rusiya Xarici İşlər Nazirliyinin Dağlıq Qarabağdakı müharibəyə verdiyi melanxolik reaksiya ondan xəbər verir ki, Moskva ermənilər və ya azərbaycanlıların dinc yaşamasının və sülh danışıqlarına başlamasının ancaq tərəflərdən birinin çox ağır zərbələr alacağı təqdirdə mümkün olacağını anlayır”, bunları epress.am saytına ermənipərəst mövqeyi ilə tanınan, rusiyalı politoloq Arkady Dubnov deyib.
“Bir daha aydın olur ki, KTMT (ОДКБ) Ermənistana yardımçı deyil, çünki Bakı “öz ərazisini” geri almağa çalışır və Dağlıq Qarabağ da KTMT üzvü deyil, bu səbəbdən “Ermənistana təcavüz edilmir”, deyə o əlavə edib.
“Moskva, Bakının Ankaranın dəstəyi ilə apardığı brutal əməliyyatları xəfifcə də olsa, qınamalı olacaq. Lakin hazırkı şəraitda Moskva Türkiyə ilə regional bir münaqişəyə girə bilməz, Belarus və Navalnının zəhərlənməsi səbəbindən Avropa ilə genişmiqyaslı soyuq müharibə ona kifayətdir.
Kreml üçüncü cəbhəni açmağa cəsarət etməyəcək, çəkinəcək… Beləliklə, müharibənin ilk günündən göründüyü kimi, İlham Əliyev hər şeyi düzgün hesablayıb. Üstəlik Ermənistandakı daxili siyasi ziddiyyəti nəzərə almaq gərəkdir, çünki dünən ən böyük müxalifət partiyası “Çiçəklənən Ermənistan”ın lideri, oliqarx Qaqik Sarukyan seçicilərin səslərinin alınması ittihamı ilə həbs olundu. Lakin oliqarxa hücumun əsl səbəbləri fərqlidir, onu “Kremlin agenti” sayırlar…
Hazırda isə hər kəs müharibənin ilk mərhələsinin necə bitəcəyini, kimin döyüş meydanında daha böyük uğur qazanacağını gözləyəcək.”
Epress.am