Üçüncü sinifdə oxuyan şagirdin başa düşməli olduğu bir dildə, maksimum sadə, aydın tərzdə yazı yazırsan, amma təssüf ki, oxucuların çoxu yazıda müəllifin nə demək istədiyini başa düşmür, yazıdan tamamilə səhv nəticələr çıxarırlar. Bir yazıda nə demək istədiyini başqa yazıda izah etməyə məcbur olursan. Buna baxmayaraq, oxucular yenə yazını başa düşmürlər, yenə də yazıdan səhv nəticə çıxarırlar. Belə olduğu halda adamın ağlına üç ehtimal gəlir:
- Oxucuların çoxunun səviyyəsi üçüncü sinifdə oxuyan şagirdin səviyyəsindən aşağıdır.
- Yazıdan tamamilə səhv nəticələr çıxarmaq bəzi oxucuların xoşuna gəlir (doğrudan da, elə adamlar var ki, qabırğalarının standartlardan qat-qat qalın olduğunu istənilən məkanda və məqamda nümayiş etdirməyi sevirlər; müəyyən mənada onları başa düşmək lazımdır, əllərindən gələn budur).
- Oxucuların çoxu sadəcə reallığı qəbul etmək istəmirlər. Həqiqətin gözünə dik baxmağı bacarmırlar. Ona görə də nala-mıxa vurmağa, hətta yazıya dəxli olmayan qəribə şüarlar səsləndirməyə məcbur olurlar. Şüar demişkən, Azərbaycanda adi faşizmin əlamətləri artıq açıq-aydın görünməkdədir. “Türkün türkdən başqa dostu yoxdur” şüarını səsləndirməklə adamların başını xətkeşlə ölçməyin arasında heç bir fərq yoxdur. “Türkün türkdən başqa dostu yoxdur” şüarını səsləndirməklə adamların başını xətkeşlə ölçmək eyni şeydir.
***
Bəzi yoldaşlar deyirlər ki, adamların “türk sözləri”ndən istifadə etmələrinə etiraz edirsən, bəs niyə adamların rus sözlərindən istifadə etmələrinə etiraz etmirsən. İlk baxışdan bu irad, bu narazılıq haqlı təsir bağışlayır. Bəli, məhz ilk baxışdan… Niyə? İndi bacardığım qədər vəziyyəti aydın və sadə şəkildə izah edəcəyəm. Hərçənd onu da yaxşı başa düşürəm ki, oxucuların çoxu bu aydın, sadə izahlardan yenə də tamamilə səhv nəticə çıxaracaq. Bunun səbəblərini yuxarıda yazmışam.
Heç vaxt adamların rus sözlərindən istifadə etmələrini təqdir etməmişəm. Belə bir şey yadıma gəlmir. Əksinə, ayrı-ayrı yazılarda, müxtəlif vaxtlarda rus dilini Azərbaycanda sıxışdırmağın yollarını göstərmişəm. Məsələn, maraqlananlar “Subyektiv siyahı” yazıma baxa bilərlər…
Evdə, avtobusda, küçədə, bazarda, mağazada rus sözlərindən istifadə edən adamlar rəsmi məkanlarda, məsələn, efirdə rus sözlərindən istifadə etmirlər. X adlı bir şəxs evdə, küçədə, bazarda rus sözlərindən istifadə etsə də, televiziyaya çıxanda rus sözlərindən istifadə etməməyə çalışır. Ən azı buna cəhd edir. Ümumiyyətlə, Azərbaycan dilinin rus dilinə qarşı immuniteti var. Rus dili Azərbaycan dilini məhv edə bilməz. Amma eyni şeyi “türk sözləri” haqqında demək olmur.
Saxta, süni, qondarma türk dili Azərbaycan dilini məhv etməkdədir. Akop Martayanın uydurduğu saxta sözlər artıq AZTV-ni də məhv edib. Akop Martayan Azərbaycan dilinin sonuncu qalasına, AZTV-nin qülləsinə öz bayrağını sancıb. Akop Martayanın bayrağı AZTV-nin qülləsində dalğalanmaqdadır.
Özümü axmaq adam hesab etmirəm. Akop Martayan adlı dağıdıcı selin qarşısını iki-üç miskin yazıyla almağın mümkün olmadığını çox qəşəng başa düşürəm. İki-üç miskin yazıyla serialların, Aslı Arslan kimi düşük, tirajlı yazıçıların, nəhəng resursları olan saytların, televiziya kanallarının qabağında dayanmaq mümkünsüzdür. Ən başlıcası, azərbaycanlıların özlərinə hörmət etmədiyini, qarşısında sitayiş etməyə daima böyük qardaş axtarışında olduğunu da hamıdan yaxşı bilirəm. Mən bu yazıları bu gün üçün yazmıram. Bu gün kiməsə nəsə sübut, izah etmək, nəsə göstərmək çətin məsələdir. Kor-korənə hisslər insanların gözünü tutub. “Sevginin gözü kor olur” sözü əbəs yerə deyilməyib. Mən bu yazıları daha çox gələcək üçün yazıram. Gələcəkdə nəsillər arasında böyük uçurum yarananda, keçmişlə əlaqə kəsiləndə, gələcək nəsillər Mirzə Cəlili, Haqverdiyevi, Çəmənzəminlini oxuyub heç nə başa düşməyəndə və bunun nəticəsində Azərbaycan klassiklərinin xalqa vurduğu radikalizm əlehinə peyvəndlər öz təsirin itirəndə, keçmişlə əlaqəsi itmiş azərbaycanlılar başı kəsilmiş toyuq kimi çabalayanda mənim bu gün nə demək istədiyimi iki-üç adam başa düşəcək.
Qoy gələcəkdə heç kim deməsin ki, niyə bu on milyonluq xalqın içində ağlı başında olan, prosesin hara getdiyini görən bircə adam tapılmayıb. Sırf bu ittihamları öz üstümə götürməmək üçün bu yazıları yazdım.