Garry Winogrand 1928-ci ildə Nyu-York şəhərində dünyaya gəlib, 1984-cü ildə Meksikada vəfat edib. Onun valideynləri Macarıstan və Polşadan Amerikaya miqrasiya etmişdilər. O, 1948-51-ci illərdə Columbia universitetində rəssamlıq təhsili alarkən universitetin qəzetində çalışan gənc fotoqrafla tanış olur və beləliklə fotoqrafiyaya marağı yaranır. Winogrand 1949-cu ildə təqaüdlə fotoqrafiya təhsili almağa başlayır. 1950-ci illərdə fotojurnalist kimi çalışsa da 60-cı illərdə televiziyanın kəskin yayılması ilə artıq fotoqrafiyada istiqamətini dəyişib küçələrə yönəlir.
Garry Winogrand 35 mm Leica markalı kamerası ilə 20-ci əsrin ortalarında Nyu York küçələrində çəkdiyi fotolara görə məşhurlaşmışdı. Onun çəkdiyi fotolar həm dövrün böyük sosial dəyişikliklərini göstərən sənədlər, həm də gündəlik şəhər həyatını sərgiləyən sənət əsərləri kimi tarixə keçmişdir. Bu dövrlərdə ümumiyyətlə fotoaparatlar kiçilərək küçə fotoqrafiyasının məşhurlaşmağına səbəb olmuşdu. O, kifayət qədər məşhur fotoqraflarla eyni zamanda işləsə də, onun fotolarındakı fərqliliklər açıq aşkar hiss olunurdu. Fərqli rakurslar, gözəl zamanlama, maraqlı insanları, yerləri görə bilmək xüsusiyyətləri ilə Garry Winogrand dövrünün ən təsirli küçə fotoqraflarından birinə çevrilmişdi. Onun üzərində illərlə işlədiyi müxtəlif fotosessiyaları var ki, bunlardan biri də “Qadınlar gözəldir” seriyasıdır.
O, “Qadınlar gözəldir” seriyası üçün Amerikanın bir çox küçələrində gəzmiş, maraqlı rakurslardan, bir çox qadının fotolarını çəkmişdi. O, bu seriyanı çəkmək üçün çox düzgün vaxt seçmişdi. 60-70-ci illər feminizmin ikinci dalğası və seks inqilabına təsadüf edir. Bu dönəmlərdə Winogrand rahat, özünəinamlı, azad, xoşbəxt və gözəl qadınların fotolarını bir araya yığır. O, marketə, çimərliyə, hovuza, işə və s. gedən qadınların fotolarını çəkib.
“Qadınlar gözəldir” kitabı 1975-ci ildə nəşr olunub. Kitabda 85 qadının fotoları yer alır. Bu kitabla feminizmin ikinci dalğasını, qadınların seksual azadlıqlarının xarici görünüşlərində təzahürünü Garry Winogrand bizlərə ustalıqla çatdırıb.
Hazırladı: Anabəyim Həsənli
Səhifəmizdə hər hansı səhv və ya qeyri-dəqiq məlumat gördükdə, həmin mətni seçib Ctrl+Enter düymələrini sıxaraq bu barədə bizə məlumat verməyinizi xahiş edirik.
