Dirijor Fuad İbrahimov 6-7 sentyabrda Latviyanın Jūrmala şəhərində dünyaca nüfuzlu Kremerata Baltica Festivalı çərçivəsində iki konsertin idarəsi ilə çıxış edəcək. I.S.Bach, M. Weinberg və s. kimi klassiklərin əsərləri daxil edilmiş proqramlarda solist qismində dünyaca məşhur violin ifaçısı, Kremerata Baltica kollektivinin və festivalının yaradıcısı Gidon Kremer və başqaları çıxış edəcək.
Əsasən Baltikyanı ölkələrin (Latviya, Litva və Estoniya) gənc musiqiçilərindən ibarət kamera orkestri olan Kremerata Baltica kollektivi Gidon Kremer tərəfindən 1997-ci ildə yaradılmışdır. Mövcud olduğu illər ərzində kollektiv yüzlərlə konsertlər vermiş, on beş CD yazdırmışdır. Onlardan biri olan “After Mozart” diski 2002-ci ildə klassik Musiqi nominasiyasında Grammy mükafatına layiq görülmüşdür.
Fuad İbrahimov 1982-ci ildə Azərbaycanın Şuşa şəhərində anadan olub. Öncə Bakı Musiqi Akademiyasını viola ixtisası üzrə, sonra isə Köln Ali Musiqi Məktəbini dirijor ixtisası ilə bitirmiş, 2008-ci ildə Mədəniyyət və Turizm Nazirliyinin təşəbbüsü ilə yaranan “Yeni Filarmoniya” gənclər simfonik orkestrinə dirijor təyin olunmuş və bu orkestrlə Berlində “Young.Euro.Classic” musiqi festivalında (2008/10), İtaliyanın Toskana şəhərində MPF musiqi festivalında (2010) iştirak etmişdir. Həmin il Köln Ali Musiqi Məktəbinin “Simfonietta” tələbə simfonik orkestrinə dirijor təyin olunmuşdur. Gənc dirijor kimi müsabiqə yolu ilə Berliner Philharmoniker, Gewandhaus Leipzig, Dresdner Staatskapelle, Konzerthaus Berlin Orchester ilə çalışmaq hüququ qazanmışdır.
Gənc dirijor müxtəlif illərdə Cənubi Vestfalia Filarmonik Orkestri, Critical Orchestra Berlin, Leipzig və Nürnberq Simfonik Orkestrləri ilə birgə dünyanın müxtəlif konsert salonlarında tamaşaçılar qarşısına çıxış etmişdır. 2014-cü ildən Azərbaycan Dövlət Filarmoniyasının aparıcı kollektivi Üzeyir Hacıbəyli adına Azərbaycan Dövlət Simfonik orketrində dirijor vəzifəsində çalışır və Neue Philharmonie München orkestrinin baş dirijoru vəzifəsinə təyin edilmişdir. Bundan əlavə Fuad İbrahimov Üzeyir Hacıbəyli adına Bakı Musiqi Akademiyasının Gənclər Kamera Orkestri “Baku Chamber Orchestra” kollektivlərinin baş dirijorudur. Bu ilin yayında gənc dirijor Salzburger Festspiele kimi nüfuzlu bir festivalın iştirakçısı olmuşdur.