İslam dininin özünəməxsus sadəliyi onun bədəvi çölündə meydana gəlməsi deyil. Bu dinin başlıca tələbi kainatı dərk edərək, hər növ eqodan təmizlənmək, yaradıcını tək, vahid güc kimi qəbul etməkdir. Dörd bir tərəfi səhralar ilə əhatələnmiş bu ucqar yerdə Məhəmməd peyğəmbərin başlatdığı inqilabın mərkəzində məhz sadəlik dayanırdı. Getdikcə genişlənən, yayılan bu dinin məbədləri standart formalarda deyildi. Bunu ilk inşa olunan məscidlərdə də görmək olar. İndiyə qədər bir çox məscid həm interyer, həm də eksteryer olaraq məni valeh etmişdi. Lakin bu gün danışacağımız bu məscid bütün standartlardan kənardır, öyrəşdiyimiz ənənəvi məscid formalarına qətiyyən bənzəməməkdədir.
Büyükçəkməcədə, şəhər kənarında bir bölgədə dizayn edilən Sancaklar Məscidi müasir İslam memarlığının ən əhəmiyyətli nümunələrindən biri olaraq qəbul edilir. Bütün qəliblərdən çıxmaq istəyən müəllif Emre Arolat Osmanlı memarlıq üslubunun günümüzdə inşaat texnikaları və texnoloji inkişaf nəticəsində köhnəlmiş olması səbəbindən İstanbula sadə və təsiredici bir məscid gətirdi.
Bu dizaynın ən vacib başlanğıc nöqtəsi ibadət yerinin hər hansı bir təmiz yer ola bilməsi və məscidin xüsusi bir formaya sahib olmamasıdır. Formaya əsaslanan nümunələrdən kənara çıxaraq fiziki və emosional qavrayışlara xitab edən bir məscid yaratmağa cəhd edildi. Məscidinin dizaynında Hz. Məhəmmədə ilk vəhyin alındığı yer olan Hira mağarasından ilhamlandığı da deyilir.
Binanın ən vacib dizayn xüsusiyyətlərindən biri, yerləşdiyi maili kənd ərazisi ilə əlaqəsidir. Məscidin yamacla birlikdə yoxa çıxması və kənardan baxıldığında məscidin minarədən başqa heç bir hissəsinin görünməməsi ən vacib hədəflərdən biri idi. Deyə bilərəm ki, olduqca uğurlu alınıb. Tədricən ərazinin yamacı ilə birlikdə enən pilləkənlər məscidin giriş yolunu müəyyən edir.
Sancaklar Məscidinin dizaynındakı sadəliyi daxili memarlıqda da görmək olar. Məscidin daxili dizaynında istifadə olunan materiallar şişirtmədən və lazımsız bəzəkdən uzaq sadə və zərif bir mühit yaratmışdır. Bu sadəlik İslam dininin və ibadətin sadəliyini və saflığını əks etdirir.
Ümumi qapalı sahəsi 1300 kvadratmetr olan Sancaqlar Məscidi 650 nəfərin eyni vaxtda namaz qılması üçün nəzərdə tutulub. Məscidin ən vacib xüsusiyyətlərindən biri, məscid memarlığında ilk dəfə qadın və kişilərin ibadət sahələrinin ayrılmamasıdır. Digər məscidlərdə olduğu kimi arxada namaz qılmaq əvəzinə qadınlar kişilərlə eyni hissədə ibadət edə bilərlər.
Sonda memarların incələmələri üçün kəsikləri, planları və görünüşləri texniki rəsmxətt ilə təqdim edirəm.
Layihənin yeri: İstanbul
Layihə növü: Məscid
Layihə Tipi Qrup: Dini
İşə götürən: Sancaklar Vəqfi
İşıqlandırma Layihəsi: Studio Lighting Design
Statik Layihə: Balkar Mühəndislik
Mexanik Layihə: Setta Mühəndislik
Elektrik Layihəsi: HB Teknik Elektrik Mühendislik
Layihənin başlama ili: 2011
Bitmə ili: 2013
Ümumi inşaat sahəsi: 1050 m2