Daimi izləyicisi deyiləm, Youtube növbəti video kimi Navalnının «reperlər, degenerat deputatlar və polis üçbucağı»na həsr olunmuş vlogunu çıxardı qarşıma. Navalnı deyirdi ki, Rusiyanın vəziyyəti çox ağırdır, ölkədə qaragüruhun təntənəsidir. Çelyabinsk şəhərinin deputatı (Navalnı onu degenerat adlandırır) hansısa reperin mahnısından «təhqir olunub»muş. «Hisslərinə xəsarət yetirilib»miş. Polisə ərizə yazıb ki, bu reper əxlaqsızlığı, pozğunluğu, kannibalizmi (belə də yazıb), narkotikləri, spirtli içkiləri, zorlamanı, qrup seksi təbliğ edir. Polis də degenerat deputatın ərizəsi əsasında reperin Çelyabinskə gəlişini qadağan edib.
Skandaldan sonra deputat internet ulduzuna çevrilir. Baxır ki, əcəb yaxşı şey imiş, hər dəfə ürəyim ulduzluq istəyəndə kimisə narkoman, adamyeyən çıxarıb hayp tuta bilərəm. Navalnı çox böyük təhlükəyə diqqət çəkir, prinsipcə istənilən vəzifəli, imtiyazlı şəxs mənəvi dəyərləri rəhbər tutaraq başqasını ittiham edə, bununla da «gündəmə» otura, xal toplaya bilər. Maraqlısı isə, bütün bu pornoqrafiyada polisin canla-başla iştirak etməsidir.
Azərbaycanda vəziyyət fərqlidirmi? Prinsipcə, bizdə də erməni məsələsini, milli-mənəvi dəyərləri nəinki deputat, demək olar ki, istənilən adam cəza aləti kimi istifadə edə, polisi də yanına alaraq rəqiblərinə, bəyənmədiklərinə zərər yetirə bilər. Deputat dediyin adam qanunverici orqanda təmsil olunduğunun, qəbulunda iştirak edəcəyi qanunların onilliklərlə qüvvədə qalacağının, milyonlarla vətəndaşın həyatına təsir göstərəcəyinin idrakında olan ciddi adamdır. Deputat mandatı parlament binasında hansısa fərdi hadisə və halları dilə gətirərək bambılılıq etmək, sosial şəbəkənin küyü ilə «milli qəhrəman» müzakirələrinə qoşulmaq haqqı vermir. Deputat dediyin adam «filan şair belə dedi, müğənni elə oxudu, yazıçı niyə o romanı yazdı, filankəs ermənidir» kimi doğrudan da degeneratlıq əlaməti olan mülahizələrlə, üstəlik ali qanunverici orqanda efiri zibilləmir. Vəkil vəkilliyin nə olduğunu hər şeydən əvvəl gərək dərk eləsin. Yeni parlament də degenerat deputatlardan xali olmayacaq, amma saylarının azalacağına ümid var, ən azından.
Bambılılığa, matışkəliyə qarşı mübarizədə maarifçilik alternativ tanımır. Adminstrativ resurslar hesabına «maarifçi diktatura» qurmaqla, Seymurun «Ha-ha-ha virusu» yazısında toxunduğu problemləri həll etmək mümkün olmayacaq, əksinə, başqa tipli münafiq ordusu yetişəcək. Hazırda çuşkalıq, məişət zəminli vəhşiliklər ölkəni bürüyüb. Məndə belə hiss var ki, Azərbaycanda həqiqətən azad seçkilər keçirilsə, hər kəsə bərabər təbliğat imkanları yaradılsa seçici ən bambılısına, həyasızına, degeneratına səs verib yuxarı başa keçirəcək.
Çox ciddi problemdir. Amma hökumətin deyin, dərin dövlətin deyin – parlamentə dair başqa qorxusu var – Qərbə işləyən təsir agentlərinin MM-ə sızması. Qərbin humanitar, iqtisadi, hüquqi və siyasi layihələrinə aktiv qoşulmuş, xarici donorlar qarşısında müntəzəm hesabatlılığı və donorlarına «dərin sadiqliy» olan adamların, yəni kollektiv Qərbin bu vacib institutda «təmsil» olunmasını istəmirlər. Hazırda namizədlərə ən ciddi «pretenziya» budur. Fərqli fikirdəsən, müxalif mövqedəsən, bunlar problem deyil – Qərbə işləyirsən, ya yox? Məsələ budur.
Konseptual olaraq belə bir «diskriminasiya»nın nəyə xidmət etdiyini başa düşürəm. Mübahisə açmayacam, əsas məsələ bu deyil. Məsələ budur ki, seçkilərə dörd gün qalıb. Kültürlü azərbaycanlılar da gərək parlamentdə təmsil olunsun. Bunu demək istəyirdim. Qızıldiş daydaylar onlarla məzələnəcəklər orda, söhbəti yox. Kültürlü adamda bütün bu işlər ikrah hissi oyatsa da, gərək dözsün, öz kültürlü mübarizəsini aramsız davam etdirsin. Cəmiyyət onlar sayəsində parlamentdə fərqli üzlər görsün, sözlər eşitsin.
