Norşöping (Norrköping) və ya İsveçin “Mançestri”. İsveçin şərqində yerləşən kiçik bir şəhərdir Norşöping. Ətrafındakı qəsəbələrlə birgə 130 minə yaxın əhalisi var. Amma şəhər yalnız İsveçdə deyil, bütün Skandinaviyada tanınır. Şəhəri məşhur edən Motala çayıdır. Şəhər çayın ətrafında salınıb, amma şəhəri özəl edən həm də odur ki, çayın qollarının istiqamətləri ondan sənayedə səmərəli istifadə etmək üçün dəyişdirilib.
Statistikaya görə XX əsrin ortalarında çay ətrafında 54 böyük fabrika işləyirmiş. Bu fabrikaların çoxu kağız və pambıq emalı ilə məşğul imiş. Şəhərin özünə məxsus xudmani tarixi keçmişi olsa da, onun çiçəklənməsi və adını ətrafa duyurması məhz Motala çayının ətrafında salınan fabrikləri və onun işçi ordusu ilə bağlıdır. Buna görə də bura İsveçin “Mançestri” adlanır…
İndi bu şəhərdə bir zamanlar fabrik olmuş ərazilər kinoteatr, Universitet, mədəniyyət mərkəzi, muzey və ya kafeteriyalar kimi istifadə edilir.
Motala çayının fəhlələr şəhərciyində fəhlələrdən qalma sənət muzeyi mövcuddur. Bu muzeydə fəhlələrin iş zamanı istifadə etdikləri əşyalar məzmun dəyişərək muzeyin maraqlı eksponatına çevrilib. Siz aşağıdakı fotosessiyada bu muzeydən eksponatlara baxa bilərsiniz.
Sağollaşmazdan əvvəl həmin şəhərcikdə gördüyüm ibrətamiz bir tarixi də diqqətinizə çatdırım: Şəhərcikdə indi dondurma satılan bir kiçik mağaza var. Hazırda dondurma satılır, amma əvvəllər aptek olub. Ondan daha əvvəl isə kiçik laboratoriya. Bunlar XVIII əsrdən qalma bu daxmanın divarındakı lövhədə yazılıb. Amma daxma qeyd olunmayan başqa məqsədlə də istifadə edilib: bir zamanlar bura pub, meyxana da olub. Edam olunacaq məhkumların edamından bir gün əvvəl bura gəlməsinə xüsusi icazə verilərmiş. Onlar da istədikləri kimi əylənər, həyatın son gününün dadını çıxararmışlar. Amma indi bu haqda daxmanın divarında heç nə yazılmır. Aydındır ki, utanırlar. Görün skandinavlar hansı mərhələyə çatıblar ki, bir zamanlar tətbiq etdikləri edam cəzasına görə indi utanırlar. Bunu dərk etmək başqa bir inkişaf mərhələsidir.
