– Xalqımız avropasayağı demokratiyaya hazır deyil, – deyirdi opponentim. – Bu kütlə – inkişaf etməmiş «danabaş kəndinin sakinləri»dir və avtoritar hakimiyyəti bir az zəiflətmək, bu hakimiyyətə xalqın sadə nümayəndələrinin, yəni hazırki nümayişçilərin gəlməyinə imkan vermək kifayətdir ki, xaos, hərc-mərclik düşsün, qan tökülsün, quldurluq və qətllər baş alıb getsin, belə şeylərə bizim qarnımız toxdur, Xalq Cəbhəsinin vaxtında bunları çox görmüşük! Bizə stabilliyin möhkəm yumruğu lazımdır! Xeyli zaman, bəlkə də yüzilliklər keçməlidir ki, xalq yetişsin. O ki qaldı, sizin «millətin vicdanı» dediyiniz adamlara, məhz onlar, barmaqla sayılacaq qədər az olan bu kəsimə, burda, qürbətdə yaşayanlar, bizə gerçək kimi görünməyən «kitabdangəlmə» demokratik təsəvvürlərdən çıxış edərək, hakimiyyəti sərt tənqid edənlərə – bu, sadəcə şüşədən cini buraxmaq cəhdidir! Əlbəttə, tənqid lazımdır, bunu kim inkar edir ki? Amma stabil həyatın qarantı olan hakimiyyət, belə tənqidçiləri qısnayacaq, təqib edəcək, qadağan edəcək, qovacaq (necə ki, burda, Rusiyada edirlər), insanlar sakit həyat arzusundadır, xaos və qeyri-müəyyənlik heç kimə lazım deyil. Bundan əlavə: hətta əldən alınan torpaqları qaytarmaq üçün belə, heç kim savaşmayacaq! Reallıq budur və onunla hesablaşmaq lazımdır.
– Amma bir xalq kimi, – cavabımda demişdim, – təqiblər, qadağalar, həbslər, sürgünlər, xalqa aid olan sərvətlərin dəhşətli şəkildə oğurlanması, hakimiyyət strukturlarının özbaşınalığı şərtləri altında normal həyat xətrinə necə inkişaf etməli?
Opponentimin cavabı belə olmuşdu:
– Hakimiyyət varlı olmalıdır, güc var dövlətdədir, həmişə və hər yerdə belə olub, elə Rusiyada da belədir, çünki ordunu, cəzaverən orqanları saxlamaq, xaosdan qorunmaq çoxlu pul tələb edir. Yeri gəlmişkən bizim hakimiyyət bəzi ölkələrlə dostluq etdiyinə görə, böyük pullar sərf etməli olur, dostumuz olmayan İrandan, bizi udmaq üçün münasib an gözləyən Rusiyadan, İsraildən və ərəb dünyasından, bizi ancaq sözdə dəstəkləyən Türkiyədən isə biz, beynəlxalq ictimaiyyət sayəsində qoruna bilirik. Siz isə hansısa xəyali, abstrakt, bizim mentalitetə yad ideyalara görə qeyri-stabilliyə, vətəndaş müharibəsinə, xaos və hərc-mərcliyə yuvarlamaq istəyirsiniz?!
– Səmimiyyətə görə təşəkkür edirəm, amma təbii ki, mən başqa cür düşünürəm və zəhmətimin «Sizif əməyi» olduğunu bildiyim halda, susmağı bacarmıram.
Çingiz Hüseynov
Yazıçı
