Hələ Qurban Qurbanovun milliyə namizədliyi müzakirə olunanda dəfələrlə, israrla yazırdım ki, bu təyinat uğursuz olacaq və bu planın altında müəyyən qaranlıq məqamlar var
O vaxt bir çox həmkarımız potensial anlaşmanı şiddətlə dəstəkləyir, Qurbanovun gəlməsi ilə yığmamızın ağ günə çıxacağını düşünürdülər. Bu barədə yazılarım, statuslarım o qədər ardıcıl və intensiv idi ki, artıq bir çox həmkarımız necə deyərlər məni ələ salmağa, qeyri-ciddi hesab etməyə başlamışdılar. Elə Google-da qısa araşdırma etməklə ardıcıl yazılarımı görmək olar. Amma çox keçmədi o vaxt bu təyinata alqış tutanlar, sevinənlər başladılar Elxan Məmmədovu söyməyə, Qurban Qurbanova tənqid yağdırmağa ki, niyə belə oldu? Qardaş, bəlli məsələ idi axı. Qəbul olmayacaq duaya amin deyəndə axırı xəyal qırıqlığı olur.
İndi də Rəşad Sadıqov məsələsi gündəmdədir və bu ad ətrafında süni ajiotaj yaradılır. Yenə həmin güruh hay-küylə Sadıqovun milliyə baş məşqçi təyin olunması ilə bağlı şiddətli müzakirə açıblar. Sanki Sadıqov ölkə futbolunun qurtarıcı mələyidir, Supermendir, o gələn kimi hər şey birdən-birə düzələcək, yollar hamarlanacaq, millimiz dünya çempionatının final mərhələsinə gedəcək.
Mən açıq danışmağı sevən adamam. Gəlin, düzü düz, əyrini də əyri deyək. Kiməsə yarınmaq, kiminsə könlü xoş olsun deyə yalandan tərifləmək mənlik deyil. O vaxtdan bu vaxta AFFA-da nə dəyişib? Elxan Məmmədov İcraçı vitse-prezident olaraq mövqeyini daha da gücləndirib, onsuz da dalı da, qabağı da kəsən qılıncının artıq qəbzəsi də kəsir. O vaxt Qurbanovla bağlanmış 6 illik müqaviləni bir ildə tələm-tələsik ləğv edən adam indi Sadıqova işləmək imkanı yaradacaq? Anlamıram, illərlə Azərbaycan futbolunu izləyən, ölkə futbolunun cikini də bikini də bilən adamlar necə olur ki, bu qədər optimist yanaşa bilirlər? Bəlkə kiminsə nəsə marağı var, kiməsə bu cür spekulyasiyalar sərf edir, bilmirəm, amma mən həmişə olduğu kimi, bu məsələyə də real yanaşıram və mümkün təyinatın çox keçmədən fiasko ilə nəticələnəcəyini düşünürəm.
Bu, işin bir tərəfidir. Gəlin, bir də digər tərəfdən, Rəşad Sadıqov aspektindən yanaşaq məsələyə. Həmişə, dəfələrlə demişəm, istənilən adama linklərlə, keçmiş Facebook statuslarımla sübut edə bilərəm ki, mən Sadıqovun yaxşı funksioner, yaxşı idarəçi, lap elə yaxşı məşqçi olacağına inanıram. Amma bir şərtlə. İşə peşəkar yanaşmalıdır. Peşəkarlıq olmayanda bütün potensiallar, perspektivlər puç olub gedir.
Rəşad hələ U-21 yığmasına baş məşqçi təyin olunanda artıq karyerasını bitirməli, bütün diqqətini məşqçilik işinə verməli idi. Amma o nə etdi? Bir əldə iki qarpız tutdu. Hətta bununla bağlı yazmışdım bir dəfə, Antalyada toplanış idi. Sabah millinin yoxlama görüşü var, Rəşad bu gün “Qarabağ”la yoxlama oyununa çıxmışdı. Halbuki, sabahkı görüşdən öncə yetirmələrinin yanında olması, onları oyuna hazırlaması daha vacib deyildimi?
Bu gün də həmin vəziyyətdir. Mən bilmirəm Rəşad Sadıqov yığmanın baş məşqçisi olmaqda nə qədər maraqlıdır, özü istəyir, ya istəmir? Amma hələ aktiv futbolçu karyerasını bitirməmiş birinin milli komandanın baş məşqçisi vəzifəsinə iddia etməsi də, namizəd kimi göstərilməsi də qeyri-peşəkarlıqdır. Yəni Azərbaycanda başqa adam yoxdurmu ki, Sadıqov oyunçu kimi də, məşqçi kimi də, hələ qeyri-rəsmi məlumatlara görə, klub funksioneri kimi də hamının dadına yetir, hamıya kömək olur?
Ümumiyyətlə, Rəşad niyə millinin baş məşqçisi olmalıdır axı? Hansı məziyyətlərinə, hansı uğurlarına görə? Məşqçi kimi nə qazanıb, nə əldə edib? Adam hələ futbolçudur. Karyerası davam edir. Nədir bu Sadıqov eşqi, nədən yaranır bu məhəbbət anlaya bilmirəm.
Söhbət çox uzandı, yekunlaşdıraraq onu deyim ki, indiki halda Sadıqovun milliyə təyinatı uğursuz olacaq, bu həmlə Elxan Məmmədovun ölkə futbol ictimaiyyətinə qarşı ikinci qələbəsi (ilki Qurbanovu biabır edib yollamaq) olacaq. Və adam deyəcək ki, gördünüzmü, sizin bəh-bəhlə təqdim etdiyiniz ikinci adam da beləcə uğursuz oldu. Və necə ki, Qurbanovdan sonra Yurçeviç kimi biabırçı bir seçim oldu, Rəşaddan (əgər olsa) sonra da daha biabırçı təyinatlara şahidlik edəcəyik.
