Füzuli və Mirzəağa Əliyev küçələri arasında yerləşən yeraltı avtodayanacağın üstündəki ərazidə salınan Qış bulvarı – Park və fəvvarələr kompleksinin açılışı 10 may 2013-cü ildə baş tutdu. Açılış mərasimində Azərbaycan Prezidenti və xanımı şəxsən iştirak etdilər.
Mətbuatın yazdığına görə Prezident memar dostlarım Kamal Musaxanov və Cahangir Axundovun müəllifi olduqları kompleksin tikintisini əvvəldən-axıra qədər şəxsi nəzarətində saxlamışdı. Prezidentin həssaslığı başadüşüləndir – ötən əsrin 20-ci illərindən başlayaraq, yəni 100 ildir Qış bulvarı ideyası mövcuddur, amma Azərbaycanda heç bir hökumət belə bir miqyas və ambisiyada layihəni həyata keçirməyə sadəcə olaraq cəsarət etməmişdi. İlham Əliyevin prezidentliyi dövründə bu, mümkün olmuşdur.
7 hektar ərazini tutan bu nəhəng park bakılıların açıq havada aktiv istirahəti üçün nəzərdə tutulmuşdu. Müəllif-memarların və sifarişçinin peşəkarlığı və zövqü sayəsində parkdakı tikililərin və kiçik memarlıq elementlərinin yüngüllük və zərifliyi Qış bulvarını Bakının vizit kartına, şəhər sakinlərinin aktiv istirahət mərkəzinə çevirdi.
Lakin, açılışdan qısa müddət sonra park elə baxımsız vəziyyətə düşdü ki, artıq həyəcan təbili çalmaq vaxtıdır. Yeddi yeraltı keçiddə quraşdırılan 24 eskalatordan ən azı yarısı heç vaxt işləmir, özü də sanki bilə-bilə, məhz yuxarı qalxan eskalatorları söndürüblər. Bəzi yerlərdə isə əlillər üçün nəzərdə tutulmuş eskalatorlar sökülüb və yoxa çıxıb. Səməd Vurğun – Füzuli küçələrinin kəsişməsindəki yeraltı dayanacağı da bağlayıblar, dayanacaq özü də bərbad vəziyyətdədir. Amma mövzumuz bunlar da deyil.
Məni, bir peşəkar memar kimi təhqir edən – park ərazisindəki yay kafelərinin görkəminə təcavüz etmiş «kəndçilər», onların həyasız müdaxiləsidir. Hansı haqla, hansı məntiqlə, hansı vicdanla bu cür kobud təcavüz baş verib; Qış bulvarının yaraşığı olan dalğavari, vizual yüngül, zərif beton konstruksiya barbarların hücumuna məruz qalıb, yan-yörəsi şüşələnib? Buna kim icazə verib? Azərbaycan Respublikasının «Memarlıq fəaliyyəti» haqqında qanununu kobud surətdə pozan kimdir və mənim təhqir olunmuş memar dostlarımın hüquqlarını kim qoruyacaq?
Elçin Əliyev
Sənətşünaslıq üzrə elmlər doktoru, professor
