AzLogos yazarı, publisist Əli Novruzov özünün Telegram kanalını açıb, mütəmadi olaraq oxucuları ilə gündəmlə bağlı qeyd və analizlərini bölüşür. Onlardan bəzilərini diqqətinizə çatdırırıq.
Elşənin hekayəsi fransız mediasında
Fransız mediasından çıxmayan iş. 6 yaşında Ağdamdan qaçqın düşən Elşənin həyat hekayəsi. Düz 36 dəqiqə! Burada deyirlər axı, dəlidən doğru xəbər. Çox güman fransız holdinqləri, şirkətləri yığıb medianı, deyib siz neynirsiz? Sizə görə indi biz Qarabağdakı rekonstruksiya işlərindən, milyard dollarlıq layihələrdən kənarda qalacayıq. Tez olun, bu qara-qura şərqlilərin könlünü alın.
Belə ucuz tryuklarla bizim könlümüzü alacaqlarsa, deməli biz bir cəmiyyət olaraq keçmişimizdən və bugünümüzdən dərs çıxarmağı hələ də öyrənməmişik. Makron başda olmaqla fransızların müharibə vaxtı və müharibədən sonra tumanlarını başlarına necə çəkdiyini hamımız yaxşı gördük. Belə şeyləri bəlkə nə vaxtsa bağışlamaq olar, amma heç vaxt unutmaq olmaz.
Hələ Fransadan Qarabağa gəlib döyüşən terrorçular haqqında reportajlar hazırlayıb bütün ölkədə qəhrəman kimi təbliğ etməklərini demirəm. Əgər doğrudan da könlümüzü almaq istəyirlərsə, birinci gərək o terrorçuları həbs edib ədalət məhkəməsində mühakimə etsinlər. Onların hamısının adları, soyadları, idbar sifətləri fransız mediasında var.
Necə olur İŞİD-ə qoşulan fransızları qanunsuz hərbi birləşmələrdə iştiraka görə vətəndaşlıqdan məhrum edirsən, amma Qarabağda marionet rejimə qoşulub Azərbaycana qarşı vuruşanları bütün Fransaya qəhrəman kimi tanıdırsan? Nə qədər o terrorçular Parisdə, Lionda, Marseldə əllərini-qollarını sallaya-sallaya sərbəst gəzir, nə Fransanın, nə fransızların bizə qarşı guya bu cür empatiya nümayişlərinin bir qara qəpik qədər dəyəri yoxdur şəxsən mənim gözümdə.
Anna xanımın sevgisi
Bu fransızlar yenə dinc durmur. Keçən gün də əleyhimizə belə bir bəyanat veriblər. Genosiddən 100 il sonra da biz türk-azərbaycanlı-cihadçılar erməni xalqının öz dədə-baba torpaqlarında dinc yaşamasına guya imkan vermirikmişikmiş. İmzalara baxdım, biri diqqətimi çəkdi: Parisin meri Anne Hidalgo.
Ümumiyyətlə, Anna xanım hər imkanda bizi qaralamağı yaman xoşlayır. Hətta bəlkə ən sevimli hobbisidir. Özü də istisnasız ancaq və ancaq erməni temalarında. Anna xanımın bizə bu patoloji sevgisinin səbəbini öyrənmək üçün İnternetdə çox da qurdalanmaq lazım deyil — əsas köməkçilərindən biri ermənidir, Anouch Toranian, o da müdirə xanımla bir yerdə bu bəyanata imza atıb. Anuş xanım özü də Paris meriyasında icma həyatı, vətəndaş iştirakçılığı və ictimai müzakirələrdən məsul məmurdur.
Haradan baxsan, tragikomediyadır. Paris kimi bir şəhərin meri olasan, amma erməni portfeldaşıyan səni əlində spinner kimi fırlatsın. Tragikomediya.
