Daxiliyanma mühərriklərinin sonuncu payızı?
2019-cu ilin Frankfurt payız avto-sərgisində əsasən elektrikli avtomobillər, yeni konseptlər tanıdıldı. Bu sahədəki yenilikləri ilə alman avto-sənayesi öz iddialılığı və qərarlılığı ilə xüsusi seçilirdi. Yeri gəlmişkən, bu ilki sərginin fərqləndirici cəhətlərindən biri də, demək olar ki, bütün elektrikli avtomobillərdə hakim olan retro tərz və iç məkanın minimalizmidir.
Almanlar sanki bütün işləri tamamlamış və əslində elə bu gün avtomobilləri bazara çıxara biləcək hazırlıqda görünürdülər. Məsələn “Porsche Taycan” 2020-ci ildən artıq yollardadır. Qeyd etmək yerinə düşər ki, məhz bu model sərginin ən iddialısı və diqqət çəkəni idi. Turbo elektrikli motor konsepsiyasını sərgidə tanıdan Porsche, maşının iki sinxron (arxa və ön) mühərrikə malik olduğunu və ikisinin birlikdə 600 at gücü təşkil etdiyini nəzərə çatdırdı.
3.5 saniyəyə 0-100 km. sürət yığan Taycan, saatda 200 km. sürətə 12 saniyəyə çatır. Dolumdan sonra 500 km. yol qət edə bilən bu model, 40 dəqiqə ərzində tam dolur. Uzunluğu 4.95 m. (Panameradan 10 sm. qısa)dır, lakonik iç panelə sahibdir və 1963-cü ilin modeli olan ilk Porschedən təsirlənərək dizayn edilmişdir. Nürnberq sınaq meydançasında 259 km.-lik maksimum sürətə çatmışdır.
Porsche Taycan xeçbek və universal olmaqla iki variantda təqdim olunacaq və qiyməti 80 000 min euro-dan başlayacaq. Porsche rəsmiləri bildirir ki, 2025-dən sonra Porschenin hər bir modelinin elektrikli variantı əlçatan olacaq.
Porsche-dən heç də geri qalmayan Mercedes-Benz, Audi və Volkswagen üçlüyü də iddialı konseptlərlə sərgidə iştirak edirdilər. Sərgidən ümumi təəssürat isə belədir ki, ilk elektrikli avto qaranquşu olan amerikalı Tesla, artıq bu işi avropalılara uduzmaqdadır. Burada, sadalanan rəqib markaların ciddi istehsal ənənələrinə malik olması faktoru da, ciddi rol oynayır. İstər dözümlülük, istər keyfiyyət, istərsə də təhlükəsizlik baxımından almanlar həqiqətən daha yaxşısını edə biləcək potensialdadır.
Məsələn, Audinin təqdim elədiyi elektrikli yolsuzluq avtomobilləri Tesla-nınkından daha praktik və əlverişlidir.
Əlbəttə elektrikli avtomobillərə xas ümumi problemlər də qalmaqdadır. Məsələn bu yolsuzluq avtomobillərinin enerji sərfiyyatı, yolsuzluq şəraitində normadakından iki dəfə artıq olur. Yəni asfaltda 400 km. yol qət edən Audi E-tron yolsuzluqda yalnız 200 km. gedə bilir. İndi dağlarda, yolsuzluq şəraitində nəinki elektrik dolum mərkəzi tapmaq, heç normalına da rast gəlmək mümkün deyil. Ehtiyat enerjisinin harasa depolanması da imkansız olduğundan, infrastruktur qurulana qədər bu avtomobillərin yolsuzluq şəraitində çox da aktiv olacağını gözləyə bilmərik.
Ancaq bu texnoloji sıçrayış, sürətli inkişaf həm də onu göstərir ki, çox yaxın gələcəkdə mövcud bütün texniki və insfrastruktur problemləri mütləq həllini tapacaq. Nə qədər banal səslənsə də, mənzərə bundan ibarətdir ki, gələcək elektrikli avtomobillərindir.
Yazı və fotolar: Əbülfəz Səfərəli
Xüsusi olaraq AzLogos üçün
Sərgidə iştirak edən elektrikli avtomobil model və konseptlərindən qarışıq seçməni diqqətinizə təqdim edirik.
