Avropa Jurnalistlər Federasiyası (EFJ) adlı qurumun 08 dekabr 2020-ci il tarixli “EFJ jurnalist Arzu Geybullanı hədəf alan təqib kampaniyasını qınayır” adlı bəyanatla AzLogos platforması və onun redaktorlarından olan Ələkbər Əliyevi hədəf almasını maraq və təəccüblə qarşıladıq.
EFJ-nin hansı haqla platformamızın fəaliyyətini sorğuladığı, tənqid etdiyi və hədəf göstərdiyi bizim üçün aydın olmadı. Çox mümkündür ki, heç EFJ-nin özü də AzLogos-un adının “qısnama”, “təqib” kimi sözlərlə nə üçün yanaşı çəkildiyini anlamır və sadəcə olaraq ritorik, gəlişigözəl, əzbər ştampları işə salaraq, klassik neo-liberal diktatura meylləri və Übermensch yekəxanalığı sərgiləyir. Odur ki, Arzu Qeybullayeva, EFJ və sair havadarların, çevrə və dairələrin nəzərinə aşağıdakıları çatdırmağı zəruri hesab edir; yazılanları diqqətlə oxumalarını və beyinlərinə həkk etmələrini şiddətlə tövsiyə edirik:
1 – Klassik media orqanı, periodika formatından uzaq olan AzLogos dünyanın dörd bir yanında yaşayan, yaşadıqları ölkələrdə faydalı əməklə məşğul olan, həmin ölkələrin qanunlarına riayət və hörmət edən intellektual azərbaycanlıların azad fikir platformasıdır. Heç bir rəsmi ünvanı, büdcəsi, ştatlı əməkdaşı olmayan AzLogos heç bir avropalı qurum qarşısında hesabatlı deyil və heç bir “avropalı” (ya da qeyri coğrafiyalı) avtoritet tanımır. Həmçinin, AzLogos üzərində Azərbaycan Respublikasının heç bir qurumunun və vəzifəli şəxsinin avtoriteti mövcud deyil. AzLogos heç bir avropalı qurumdan maliyyələşmədiyi və maliyyələşməyi düşünmədiyi kimi, Azərbaycanın da heç bir rəsmi, yaxud qeyri-rəsmi qurumundan maliyyələşmir və maliyyələşməyi planlaşdırmır. Bizim müəlliflərimiz və əqidədaşlarımız arasında kifayət qədər maddi imkanlı şəxslər var və tamamilə ianələr hesabına fəaliyyət göstəririk.
2 – AzLogos yalnız və yalnız Azərbaycan xalqı qarşısında hesabatlıdır. Hərçənd, işin ironiyası ondadır ki, Azərbaycan ictimai fikrində AzLogos-un özü zaman-zaman “əxlaqsızlığı yayan, xalqı və dövləti təhqir edən sayt” ittihamları ilə üz-üzə qalır. Bu ittihamların da hamısı səhvdir – biz bu yola nəyəsə müxalif olmaq niyyəti ilə çıxmamışıq. Məramnaməmizdə də qeyd olunduğu kimi, qayəmiz, harada yaşamasından asılı olmayaraq, azərbaycanlılar arasında dünyəvi ideyaları, yüksək zövqü, tənqidi düşüncəni yaymaq və dəstəkləmək; əhalini gender problematikası ilə tanış etmək, yeni tendensiyalar haqda məlumatlandırmaqdır.
3 – Arzu Qeybullayevaya qarşı AzLogos platformasında heç bir qısnama kampaniyası aparılmayıb. Arzu Qeybullayeva ölkəmiz üçün kritik və ağır günlərdə dövlətimizə və xalqımıza böhtan atıb, erməni həmkarları ilə çıxdığı efirlərdə klassik kollaborasionist mövqe sərgiləyib, banal yalanlar danışıb, bambılılıq edib, özünü buraxıb və əlahiddə düşüklüyünə görə də tənqid olunub. Onun şəhidlərimiz üçün anım saatı olan 12.00-da qılçalarını aralayaraq çəkdirdiyi fotosu hər kəsə açıq olan Instagram hesabından götürülüb, haradan götürüldüyü qeyd olunub, dolayısı ilə privat həyatına müdaxilə olunmayıb. Hansısa trolların, sosial şəbəkə istifadəçilərinin, botların, friklərin, ev xanımlarının, qəzəbli kişilərin Arzu Qeybullayevanın “inbox”una yaxud profilinə yazdığı şərhlərə, söyüşlərə, ona göndərilən hədə və ola bilsin «dickpic»lərə görə AzLogos heç bir məsuliyyət daşımır və hesab edir ki, bütün bunlar Arzu Qeybullayevanın bu həyatda şəxsi tragediyası və ekzistensiya problemləridir. EFJ adlı qurum bu problemləri qloballaşdırmaq, Arzu Qeybullayevanı qanadının altına almaq istəyirsə, özü bilər. Amma bilib-bilmədən bizim platformanın adını anması, bəyanat yayması, platformanın redaktorlarından yazıçı və publisist Ələkbər Əliyevin adını hallandırması, onu hədəf göstərməsinin özü qeyri-peşəkarlıq, əbləhlik və avropalı lotuluğudur. Tövsiyə edirik ki, həddinizi biləsiniz.
4 – İkinci Qarabağ müharibəsi dövründə AzLogos müharibənin gedişatına, ümumiyyətlə hərb və sülh tematikasına dair yerli və xarici müəlliflərin irqçilikdən, nifrət dilindən uzaq esse və analitik yazıları ilə çıxış edib. Biz, Azərbaycanın haqlı davasında dövlətimizin və xalqımızın maraqlarını qorumağı üstün tutmuşuq və çox yaxşı eləmişik, bundan sonra da bu xətt üzrə qalacağıq. Arzu Qeybullayeva və onun kimi ədalətsiz, haqsız və düşməncə mövqedə dayananları ifşa və tənqid etmək haqqımızı bundan sonra da özümüzdə saxlayacaq; nə EFJ, nə də hansısa başqa qurumun bizə ağıl öyrətməsini qəbul etməyəcəyik. Gedin, maliyyələşdirdiklərinizə, sizdən asılı vəziyyətdə olanlara, kollaborasionist və əqidəsizlərə jurnalistika və əxlaq dərsi keçin. Biz, intellektual ənginlik, transendentlik və iradə kşatriyalarıyıq. Şudralarla işimiz yoxdur. Sizə nəyisə izah etməyin özü belə intellektimizi təhqir edir.
5 – AzLogos olaraq bir daha, altını cızaraq bəyan edirik – nəinki EFJ, bundan sonra Arzu Qeybullayeva və Co.-nun şəxsi problemlərini həll etməyə təşəbbüs göstərəcək və bizə dil uzadacaq, bizi ünvan göstərəcək istənilən avropa və qeyri-avropa qurumuna öz layiq olduğu yeri göstərəcəyik. Gedin, öz işinizlə məşğul olun və bir daha əsla platformamızın fəaliyyətini mühakimə və müzakirə etmək həvəsinə düşməyin. Anti-azərbaycan, daşnak mövqeyinizi haqq-ədalətin bərpası adı altında bizə soxuşdura bilməzsiniz. AzLogos üzərində kşatriya mərtəbəsinə ucalan Azərbaycan xalqı və ulu kosmogen şərtilikdən başqa heç bir qüvvə, avtoritet yoxdur. Biz bundan sonra da ehtiyacı olanlara mərdlik, qorxmazlıq və özündən əminlik üzrə master-klass keçəcəyik. Azərbaycan xalqı nəyə qadir olduğunu 27 sentyabr-10 noyabr tarixləri arasında bütün dünyaya nümayiş etdirdi.
Ya Allah, xoş getdiniz.
AzLogos – Dünya azərbaycanlılarının intellektual platforması
