Həm Bakı Şəhər İcra Hakimiyyəti, həm Daxili İşlər Nazirliyi mətbuata belə bir xəbərin ötürülmədiyini deyirlər. Bunu onlar Baku.ws saytına bildiriblər. Halbuki bir neçə saat əvvəl, ONA.az resursu “Hüquq-mühafizə orqanlarına” istinadla azərbaycanlıları aşağılayan qərarın xəbərini yaymışdı. İndi isə, rəsmilər bildirirlər ki, “Belə məlumatlar şəbəkə təxribatı xarakteri daşıyır”.
Kimdir “Şəbəkə təxribatı xarakteri daşıyan” xəbərləri yayan?
***
Bakı Şəhər İcra Hakimiyyəti mayın 25-dən 31-nə qədər “Tarqovı”ya yerli sakinlərin buraxılmamasına münasibət bildirib.
Şəhər İcra Hakimiyyətinin Mətbuat Xidmətinin rəhbəri İsrafil Kərimov BAKU.WS-ə açıqlamasında qeyd edib ki, bəyan edirik ki, bu barədə mətbuatda verılən məlumatlar həqiqətə uyğun deyildir və hər hansı məhdudiyyət tətbiq edilməyib.
Belə məlumatlar şəbəkə təxribatı xarakteri daşıyır. Futbol kütlələrin baxdığı, azarkeşlik etdiyi oyunudur. Onu hamı sevir və hər hansı məhdudiyyət yol verilməzdir. Əksinə həmin gün şəhərdə bayram əhval-ruhiyyəsi hökm sürəcək, müxtəlif tədbirlər keçiriləcəkdir.
***
Mayın 25-dən 31-dək “Tarqovı”, İstiqlaliyyət küçəsi və Fəvvarələr meydanına vətəndaşların girişi məhdudlaşdırılması ilə bağlı mətbuatda yayılan məlumatlara Daxili İşlər Nazirliyi münasibət bildirib.
Bu barədə Daxili İşlər Nazirliyinin mətbuat xidmətinin rəhbəri Ehsan Zahidov BAKU.WS-ə açıqlama verib. Onun sözlərinə görə, nazirlik bu barədə heç bir məlumat yaymayıb.
“Daxili İşlər Nazirliyi tərəfindən belə bir məlumat yayılmayıb”, – deyə Ehsan Zahidov bildirib.
***
Azərbaycanın hüquq-mühafizə orqanları belə bir məlumat yayıblar ki, “UEFA Avropa Liqasının Bakıda keçiriləcək final oyunu ilə əlaqədar, mayın 29-da baş tutacaq oyunu izləmək üçün ölkəmizə çoxsaylı əcnəbi azarkeşlər ilə bərabər turist axını da gözlənilir.”
Maraqlı olan bundan sonrakı hissədir:
“Bütün bunları nəzərə alan və həmin günlərdə gücləndirilmiş iş rejimində xidmət aparacaq hüquq mühafizə, o cümlədən daxili işlər orqanları tərəfindən final oyunu ərəfəsində ictimai asayişin və ictimai təhlükəsizliyin daha etibarlı qorunması, oyunu izləmək üçün gəlmiş çoxsaylı əcnəbilərin rahat, maneəsiz və sərbəst gəzintilərinin təmin edilməsi üçün may ayının 25-dən 31-dək paytaxtın bəzi mərkəzi küçə və meydanlarında, xüsusən də Nizami (“Tarqovı”) və İstiqlaliyyət küçələrində və Fəvvarələr meydanında vətəndaşların sıx hərəkətinə, eləcə də “Respublika Günü” ilə əlaqədar “İstiqlaliyyət” küçəsindəki abidəni ziyarətə gəlmələrinə məhdudiyyətlər qoyulacaq.”
Azərbaycanlıları faktiki olaraq, ikinci sinif vətəndaş yerinə qoyan, ölkəni rəzil edən bu adamlar kimlərdir, kimin qələmindən çıxıb bu xəbərdarlıq?
Bizim burnumuza pis qoxular gəlir. Olmaya bu “hüquq-mühafizə orqanları” Məhsul stadionunda “izdihamlı mitinq” keçirilməsinə logistik dəstək verən “hüquq-mühafizə orqanlarıdır”?
Biz, cavab tələb edirik. Azərbaycanlıları təhqir edən bu mətnin mətbuata ötürülməsinə kim sanksiya verib və hökumət rəhbərliyinin bundan xəbəri varmı?
Mövzunu diqqətdə saxlayacağıq.
Səhifəmizdə hər hansı səhv və ya qeyri-dəqiq məlumat gördükdə, həmin mətni seçib Ctrl+Enter düymələrini sıxaraq bu barədə bizə məlumat verməyinizi xahiş edirik.
