Sizə maşın təklif olunur, daha doğrusu yarı fayton, yarı velosiped. Qiyməti də 151.490 Avro. Alarsınızmı?
Bu günlərdə, Ştutgart şəhərindəki «Mercedes-Benz» muzeyini ziyarət etmək imkanım oldu. Lakin forma və məzmun olaraq tarixlə o qədər harmoniya içində olan bir muzeydir ki, onu insanlığın son 200 ilə yaxın ictimai-siyasi dövrünün qısa kitabəsi də adlandırmaq olar. Muzeyin salonlarında 1886-cı ildə estehsal edilmiş dünyanın ilk avtomobilindən (üç təkərli) bu günümüzə qədər istehsal olunmuş və gələcəkdə istehsal olunacağı düşünülən Mercedes-Benz modelləri sərgilənir. Muzeyin divarlarında isə bu markaların istehsal olunduğu ildə dünya tarixində hansı ümdə hadisənin baş verdiyi təsvir edilir. Bu, ziyarətçilər üçün də, olduqca maraqlıdır.
Muzey iki hissədən ibarətdir: Muzeyin giriş hissəsi yeni və istifadə olunmuş Mercedes modellərinin satış salonu hesab olunur. Fotosu təqdim olunan üç təkərli avtomobil də bu hissədə satılır. O, dünyanın ilk avtomobil modelidir. Onun orijinalı isə muzeyin daha böyük hiissəsində, Mercedes-Benzin avtomobil markaları xronologiyasında ilk eksponat kimi sərgilənir. Onun istehsal tarixi 1886-dır. Bu maşın, mühərrikli nəqliyyatın ilk nümunəsidir.
Satış salonu muzeyin kiçik bir hissəsidir. Muzeyin böyük hissəsi ilk avtomobildən bəri istehsal olunmuş avtomobillərin və mühərriklərin sərgiləndiyi hissədir. Bu muzey insana təqribən 150-200 ildə bəşəriyyətin fikir təkamülünün addım-addım necə inkişaf etdiyini göstərir. İlk istehsal olunmuş Mercedes markası ilə sonuncunu yanaşı qoyduğumuzda insan inana bilmir ki, əvvəlki oyuncağa bənzər avtomobil sonuncu modern avtomobilin ulu babasıdır.
Sizi fotolarla baş-başa qoymazdan əvvəl, muzeydə ağlıma gələn bir fikri də paylaşmaq istəyirəm: ilk istehsal olunmuş avtomobillərə baxdığımızda üzümüzdə yaranan təəccüb dolu təbəssüm təqribən bir əsr sonra, dövrün insanlarının da dodaqlarına qonacaq. Misal üçün onları əsas təəccübləndirəcək şeylərdən biri bizim indi kainatı kəşf etmək üçün kosmosa göndərdiyimiz süni peyklərin primitivliyi olacaq. Amma təəssüf ki, həmin nəsil bizim indi Mercedes-Benz muzeyində gördüyümüz kimi, real eksponatları görə bilməyəcək. Çünki bizim indi kosmosa göndərdiyimiz süni peyklər öz işlərini bitirdikdən sonra ya elə oradaca məhv olur, yaxud da hava boşluğunda nəzarətsiz formada hərəkət edirlər.
