Onun kimisi, bir daha heç vaxt olmayacaq. Biz, onu hələ çox axtaracağıq.
İlhamə, Şərq qadınının bütün meşşan xüsusiyyətlərini, xrestomatik qüsurlarını, sovet Bakısının 70-90 illər ab-havasını; bugünəcən də var olan rektoriçaların, direktrisaların, şöbə müdirələrinin, qlavvraçların, “effektnı” qaynanaların, “moya krasavitsa” kafedra müdirələrinin zəngin mənəvi dünyasını özündə təcəssüm etdirmişdi. Bir meqa-poli-şəxsiyyət idi İlhamə.
Kim bildi qədrini?
Onun kimi nəhəng bir yırtıcı meşşan qadın ordusu var ölkədə. İçləri qaranlıq, zahirləri parlaq.
***
Bəziləri nahaq düşünür ki, İlhamə yalnız şoubiznes fenomeni idi.
O, özünü bu cür dar, şərti çərçivələrə salmırdı. İlhamə özünü “statuslu” sənətçi adlandırırdı. Deyirdi (indi deməsin) “anam məni kraliça doğub”, “mən bu həyatımdan öncə kraliça olmuşam”.
Özünün davranışı ilə İlhamə bu cəmiyyətdə hakimiyyətə paralel bir “matriarx” obrazı yaratmaq istəyirdi. O, rüşvətxor, büdcə talayan, alverçi, kölgə iqtisadiyyatının simaları olan qadınların; pula, var-dövlətə və onların gətirdiyi saxta nüfuza həvəsli gənc qızların, “saxlanılan” aşnaların, məmur-biznesmenlərin evdə darıxan “mərifətti kadınlarının” mənəvi dünyasının Matronası olmaq iddiasında idi.
Primadonna – birinci xanım deməkdir!
O, siyasi statusla olmasa da, bu cəmiyyətdə birinci xanım rolunda çıxış etmək istəyirdi.
Hakim ailəyə yaxınlığını tez-tez və mübaliğəli qabardırdı. Onları və özünü – “biz” kimi görürdü.
Belə idi xanım İlhamə. Belə idi canım İlhamə.
Siz də deyirsiniz manıs başçısı olub, vəssalam.
Bu, onun xatirəsinə təhqirdir!
Hörmət və ehtiram kahinəsi İlhamə! Kahinələrin kahinəsi!
İlhamə, o qadınların canlı bütü oldu.
Zeus tanrısının yunan məbədindəki heykəli oldu.
Bir Rodoslu Kollos kimi Azərbaycan cəmiyyətinin üzərinə çökdü İlhamə. Hamımız altında qaldıq.
Baxın!
Doyunca baxın!
Və tanıyın İlhaməni!
Hər sadaladığım qadın tipajında tanıyın İlhaməni!
Ad günün mübarək, effektni xanım, krasavitsa, primadonna!
Azərbaycanda təhsil, tibb və b. sahələrdə çalışsalar da, özlərini müğənni, aktrisa kimi aparan, sənin kultunun sadiq kahinələrinə xeyirduanı göndər, qovuşduğun əbədiyyətdən!
