Son 3 ildə ilk dəfə idi ki, Tiflisə gələ bildim. Bu şəhəri bir daha görə bildiyim üçün öz taleyimə minnətdarlığım sonsuzdur. Açığı, hələ də inana bilmirəm burda olduğuma və inanmadığıma görə də, sevincimi hələ də tam yaşaya bilmirəm.
Bizim gəlişimizin ikinci günü Tiflisdə bu günə qədər davam edən bir proses başladı. Gürcü xalqı Abxaziyanın Gürcüstandan ayrılmasını dəstəkləyən siyasətçinin Gürcüstan parlament sədrinin kürsüsündə əyləşməsinə dözə bilmədi. İndi onlar ayağa qalxaraq, Rusiyanın ölkələrinə təsirinə, rusiyapərəst məmurların vəzifə başında olmasına etiraz edirlər. Bir həftədən çoxdur ki, mitinqlər səngimək bilmir. Parlament binası qarşısına toplanmış etirazçılar hər axşam çıxışlar edir, müxtəlif narazı qrupların üzvlərinə söz verir, insanları kütləvi etiraza səsləyirlər.
Vəziyyəti daha da qəlizləşdirən gürcü polisinin mitinqin ilk gecəsində etirazçıların üzərinə gözyaşardıcı qaz sıxması, bundan ciddi zərərçəkənlərin olması idi.
Bəs, bütün bunlar Tiflis həyatına necə təsir etdi? Bir az müşahidələrimi bölüşmək istəyirəm.
Ondan başlayaq ki, mitinqlər Rusiyaya etiraz ovqatında olsa da, bu gün də şəhər mərkəzində rus turistlərə rast gəlmək adi haldır. İlk günlər xidmət sektorunda işləyənlərə rusca müraciət edəndə çəkinirdim, amma sonra fərqinə vardım ki, rus dili demək olar ki, heç kimdə qıcıq ya qəzəb yaratmır, gürcülər sakitcə rusca cavab verir, rus dilini bilməyənlər də bu dili bilən həmkarlarını kömək üçün çağırırlar ki, müştəriyə rahat olsun. Restoran, otel, dükanlar, taksi, salonlarda vəziyyət belədir. Yandex taxi bütün gücü ilə Tiflisdə işləyir və başqa taksilərlə müqayisədə daha sərfəli olduğu üçün daha çox istifadə edilir.
Təbii ki, mitinqlər bəzi narahatlıqlar da yaradıb. Mitinqlər axşamlar, şəhərin mərkəzi küçəsində baş tutur, əsas küçə və ona yaxın küçələr tamamilə bağlanır, insanlar məcbur alternativ yollardan istifadə edir, buna görə də, axşamlar saatlarla davam edən bir tıxac yaranır.
Rustaveli və ona yaxın küçələrdə fəaliyyət göstərən hotel, hostel və kirayə evlər sürətlə ucuzlaşır, çünki aylar öncə avropalların bu ərazidə etdikləri bronlar mitinqə görə ləğv olunur. Buna görə də, sahibkarlar məcbur qalıb, qiymətləri 40-50 faiz endirməli olublar.
Şəhərdəki turistlər sürətlə azalır. Şardeni, Rustaveli, Marcanaşvili kimi gecə əyləncə məkanlarının dolu olduğu yerlər indi sakit, nisbətən adamsızdır. Mitinqlər, tıxaclar, gürcü gəncliyinin gecələr barlara, əyləncə məkanlarıma deyil, mitinqə axışmaları turistlərin gecə həyatını sıxıcı edib və onlar hazırda daha qaynar gecə həyatının yaşandığı yerlərə üz tutublar. Məsələn, Batumiyə.
Tiflis yerli sakinlərin, bu şəhərin sadiq sevgililəri olan, mitinqlərə görə üzü dönməyən Tiflis aşiqlərinin və bu şəhərdə özünü təkbaşına bir ədəbi proses kimi aparan Seymur Baycanın ümidinə qalıb.
