Qafqazda yaranmış situasiyaya açıq şəkildə qarışmayan ABŞ, buna baxmayaraq, bölgədə nüfuzu olan digər ölkələrə bu istiqamətdəki gələcək siyasəti ilə bağlı siqnallar ötürür. Bu haqda Türkiyənin Milliyet qəzeti yazır.
Qeyd olunur ki, ABŞ Dövlət Departamentinin Avropa və Avrasiya Məsələləri Bürosunun rəhbərlərindən Corc Kentin mart ayında, Vaşinqtonda yerləşən Xəzər Siyasi Mərkəzində etdiyi çıxışda, Amerikanın Qafqaza dair bir sıra əsas vəzifələri dilə gətirilib. Hazırda Rusiya, Çin və İranın mövqelərinin güclü olduğu və öz maraqlarını həyata keçirdikləri Dağlıq Qarabağdakı həll prosesinə Vaşinqtonun da qoşulmasının zəruriliyi xüsusi vurğulanıb. Həmçinin, Kent Qafqazda “sülh və təhlükəsizliyi” təmin etmək üçün ABŞ-ın bölgəyə strateji dəstək göstərməyə davam edəcəyini qeyd edib.
ABŞ-ın Azərbaycandakı keçmiş səfiri Robert Sekuta isə, öz növbəsində, Rusiyanın bölgədə, xüsusən də Ermənistandakı “narahatlıq doğuran ” hərbi mövcudluğuna diqqət çəkib. Onun fikrincə, ABŞ bölgədə sülhün bərqərar olmasında fəal iştirak etməli və bu prosesdə aparıcı rol oynamağa çalışmalıdır. Xəzər Siyasi Mərkəzinin direktoru Əfqan Nifti də oxşar mövqe nümayiş etdirərək, ABŞ-ın Qafqazda Türkiyə ilə əməkdaşlığına ehtiyacın olduğunu qeyd edib.
Milliyet yazır ki, başda Rusiya olmaqla, Vaşinqton digər ölkələrə “bölgədə hələ də gözü və qulağının olduğunu” göstərmək istəyir və “lazım gələrsə, enerji təhlükəsizliyi və iqtisadi sahədə, mövqelərini heç kimə güzəştə getmədən, istənilən addımı atmağa hazır olduğunun siqnalını verir.”
Keçən ilin noyabrında, ABŞ-da nəşr olunan The National Interest dərgisi, Amerika kəşfiyyatının Dağlıq Qarabağdakı son hərbi münaqişə zamanı üç ciddi səhvə yol verdiyini və bunun nəticəsində, ABŞ-ın bölgədəki mövqeyinin əhəmiyyətli dərəcədə zəiflədiyini yazmışdı. Nəşrə görə onlardan biri, ABŞ kəşfiyyatının Rusiya sülhməramlılarının Dağlıq Qarabağa girəcəyini vaxtında proqnoz edə bilməməsi idi.
