Robert Frank 1924-cü ildə İsveçrədə, orta təbəqəyə mənsub ailədə, rahat şəraitdə böyümüşdü. O, orta məktəbi bitirdikdən sonra 1941-ci ildə fotoqraf Hermann Segesserin yanında tələbəliyə başlayır. Bununla yanaşı Frankın ailəsi H.Segesserlə eyni binada yaşayırdı. Bir il sonra gənc Robert fotoqraf Michael Wolgensingerin yanında işləməyə başlayır. Wolgensinger onu jurnallar, qəzetlər və kitab çapı industriyası ilə tanış edir. Müfəssəl təlimdən sonra o, 1946-cı ildə ilk dəfə 40 fotoluq kitabını nəşr edir. Bu kitabda o, İsveçrənin sadə kənd həyatını təqdim edirdi.
İçveçrədəki məhdudiyyətlərdən bezmiş Frank 1947-ci ildə vətənini tərk edərək Birləşmiş Ştatlara miqrasiya edir. Nyu-Yorka gəlməyindən az bir müddət sonra Harper`s Bazaar adlı məşhur jurnalda iş tapır. Lakin o, tezliklə buranı da tərk edib Cənubi Amerikaya səyahət edir. Robert əsasən Peruda qalır və 35 mm Leica kamerası ilə çoxlu fotolar çəkir. 1949-cu ildə Nyu-Yorka qayıdır və əldə hazırlanmış ikinci kitabını nəşr edir. 1949-cu ildən 1953-cü ilədək Robert Frank Nyu-York və Avropa arasında gedib gəlir.
O, bir iki əsas obyektə fokuslanıb insanların mədəniyyətini anladığı kimi göstərməyə çalışırdı. Məsələn, Parisdə əsasən stulları və gülləri, Londonda bankirləri, Uelsdə mədənçiləri çəkirdi. Fotoqraf Robert Frankın hələ gənc yaşlarında çəkdiyi bu maraqlı fotolardan bir neçəsini sizə təqdim edirik.
Hazırladı: Anabəyim Həsənli
