Əzizim Cavid bəy!
ABŞ-ın “World Literature Today” ədəbi dərgisində amerikalı filoloq Olqa Zilberburqun mənim “Əlvida, Əylis” adlı kitabım barədə yazdığı məqaləyə münasibət bildirdiyinə görə sənə səmimi qəlbdən təşəkkür edirəm.
AzLogos oxucularının nəzərinə çatdırmağı özümə borc bilirəm ki, adı çəkilən kitab təkcə sənin öz məqaləndə səxavətlə bəhs etdiyin “Daş yuxular”dan ibarət deyil. Bu kitaba son illərdə yazdığım “Yəmən” və “Möhtəşəm tıxac” adlı böyük həcmli əsərlərim, bir də “Əlvida, Əylis” adlı sənədli-bədii oçerkim daxil edilib. Və, deməli, xanım Zilberburqun kitaba pozitiv maraq göstərməyinin səbəbi təkcə “Daş yuxular” deyil, bütövlükdə kitabın estetik məzmununun və sənətkarlıq xüsusiyyətlərinin məcmuudur.
Yazdığın məqalədən belə bir qənaət hasil etdim ki, kitaba salınan əsərlər içərisində sənin oxuduğun yeganə mətn hələlik yalnız “Daş yuxular”dır. Özü də ruscadan tələm-tələsik tərcümə edilib saytlarda yayınlanan qanadı qırılmış – rəngsiz, ahəngsiz, işıqsız–ölü bir mətn!.. “Daş yuxular”ın original hələ ki heç yerdə çap olunmayıb və mən bu tərcüməni təbii ki, öz mətnim saymıram. Elə buna görə də sənin bu əsər barədə dediklərinə cavab verməyi məntiqsiz və mənasız hesab edirəm. Əlavə məlumat üçün yalnız onu deyə bilərəm ki, “Daş yuxular” – “Əlvida, Əylis” kitabına daxil edilməzdən əvvəl – alman, italyan, ispan, fin, çex, slovak, rumın, latış və erməni dillərində də ayrıca kitab şəklində nəşr edilib.
İstərdim saytın oxucuları bunu da bilsin ki, mənim ABŞ-da ingilis dilində nəşr edilən bu yeni kitabım barədə ABŞ və İngiltərənin bir sıra ədəbi orqanlarında bundan əvvəl də çox sayda rəy və məqalə dərc edilib. Məsələn, amerikalı professor Rayan Strederin geniş və əhatəli məqaləsi. Cavid bəydən ərk ilə xahiş edərdim ki, ruscası və originalı contact.az saytınında da yerləşdirilmiş bu məqaləni imkan tapıb oxusun və lazım bilsə AzLogos-un oxucularını da həmin mətn ilə tanış etsin. Azərbaycan oxucusunun belə bir mətnlə tanış olmağı, məncə, AzLogos saytının nüfuzuna xələl gətirməzdi.
Nəhayət, qələminə hörmət bəslədiyim Cavid bəyin nəzərinə bunu da çatdırmaq istərdim ki, onunla canlı polemikaya qoşulmağa həmişə can-başla hazıram.
9 sentyabr, 2019
