Dünya ağlını çoxdan itirib. Bu əbədi həqiqət hamıya aydındır. Amma son zamanlar çox əndirəbadi, ilginc hadisələr, xəbərlər çıxır ortalığa. Misal üçün uzağa niyə gedək, götürək elə Euronews.com dərgisindəki ilginc «Germany ‘still pays UK and Belgian pensioners who served in Hitler’s SS’» (Almaniya hələ də Hitler SS-ində yetkili olmuş Böyük Britaniya və Belçikalı təqaüdçülərə gizlincə ödənişlər edir) məqaləsini.
Yazıdakı məsələlər sadəcə inanılmazdır. Deməli İkinci Dünya müharibəsi dövründə Hitler rejimi ilə əməkdaşlığa razılıq vermiş hazırkı onlarla təqaüdçü hələ də o anlaşmaya görə Almaniyadan gizli ödənişlər alır. Bu insanları yalnız bu ölkələrdəki alman səfirləri tanıyırmış və Hitler dayıdan gələn “müavinəti” adamlara gizlincə nağd pulla ödəyirlərmiş.
Bir daha təkrar edirik, söhbət burda ölkərin işğalından sonra sadiqlik və itaət andı vermiş, SS-də xidmət edəcəklərinə imza atmış Belçika və Böyük Britaniya vətəndaşlarından gedir. “Müavinət” məbləğləri ayda 435-dən 1275 avroya qədər imiş, halbuki RTBF dərgisinin məlumatına görə, deportasiya edilmiş və müharibə dövründə məcburi əməyə məruz qalanlara Almaniya ayda cəmi 50 avro ödəyir.
Belçikalı millət vəkilləri bununla bağlı hökumətləni “öz ölkələrinin və Almaniya da daxil olmaqla Avropa təsisçiləri tərəfindən götürülən bütün öhdəliklərin, yəni tarixi və sosial ədalətin, eyni zamanda mənəvi öhdəliklərin bərpa edilməsinə” çağırıb.
Yazının sonunda qeyd edilir ki, bu müavinətlər Hitler tərəfindən verilmiş və 1945-ci il Potsdam Konfransında ləğv edilməyən yeganə fərman idi.
İlginc məlumatdır, deyilmi? Əlbəttə, müstəsna.
Əslində bu məsələyə müxtəlif rakurslardan baxmaq olar. Müasir alman dövlətinin Hitlerlə hansı əlaqəsi var? Əlbəttə ki, heç bir, doğrudan da bu belədir. Amma nədən yenə də bu ödənişləri etməyi üstün tutublar? Görünür burada da alman pedantlığı öz işini görüb, düşünülüb ki, əgər dövlət hansısa öhdəliyi öz üzərinə götürübsə, o zaman bunu hökmən sona qədər yerinə yetirmək gərəkdir, hətta bu legitimsizlik bahasına başa gəlsə belə.
Bu baxımdan, haqqında indi bəh-bəhlə danışılan keçmiş sovetlərin almanlara çatmasına əlbəttə hələ çox var. Niyə? Çünki öhdəliklərini yerinə yetirmirlər.
Ən bariz nümunə? Buyurun – Azərbaycan və Ermənistan SSR xalq artisti, hər iki ölkədə hamının sevimlisi, əzizimiz, iki gözümüz Zeynəb Xanlarova.
Dəyərbilən partiya və hökümətimiz, ümumiyyətlə xalqımız Zeynəb xanımın qədrini hələ sağlığında bilmiş, ona bütün mümkün olan və olmayan mükafatları və fəxri adları vermişdir, bu öz yerində, bizim borcumuzdur ki, ruhumuzu oxşayan əbədiyaşar müğənnimizə belə dəyər verək.
İndi isə gələk məkrli qonşularımıza. 3 mart 1978-ci ildə Ermənistan və Azərbaycan SSR arasında mədəni əlaqələrinin inkişafı və böyük ifaçılıq istedadına görə Zeynəb Xanlarova Ermənistan SSR xalq artisti kimi yüksək ada layiq görülür. Deyilənə görə bu işdə Ermənistan SSR Kompartiyasının Mərkəzi Komitəsinin Birinci Katibi, yoldaş Karen Dəmirçiyanın da xüsusi əməyi olubmuş. O zamanlar Zeynəb xanımı Ermənistanda hamı tanıyırdı.
Doğrudur, o vaxtı biz də cavabsız qalmadıq, hər zaman qəlbi açıq, ürəyi geniş toplum olduğumuzu bu dəfə də sübut etdik, əvəzində 1982-ci ildə erməni əsilli müğənni xanım Nairui Allahverdyana da Azərbaycan SSR xalq artisti adını verdik, əlbəttə, başqa necə ola bilərdi ki? Bizə bir edənə, biz hər zaman iki edərik, ürəyimiz geniş, qəlbimiz hər zaman açıq olub.
Nə isə, nağıl dili yüyrək olar, bu işdən 10 il keçməmiş mənfur qonşularımız bizə xəyanət etdilər, arxamızdan xəncərlə vurdular. Sonrakı hadisələr hamıya məlumdur. Şübhəsiz ki, o zamandan, yəni artıq 30 ildən çoxdur ki, onlar torpaqlarımızın işğalı, ərazilərimizin zəbtindən başqa Zeynəb xanımın halalca pullarına da erməni hərisliyi ilə göz dikiblər.
30 ildir Ermənistan SSR xalq artisti yüksək adını daşıyan Zeynəb Xanlarovanın halalca müavinəti verilmir! Bu nə dövlətdir canım? İşğalçı olmaqdan başqa, həm də oğru və yalançıdır. İndi ortaya çıxmış sülhpərvərlik söhbətləri ilə heç cür bir araya sığmır bu həyasızlıq. Belə olmaz, heç olmazsa almanlardan ibrət götürün, ay Astvats!
Bizim biganəliyimiz də burada öz acı rolunu oynamaqdadır, belə olmaz yoldaşlar! Dünya şöhrətli müğənnimizin 30 illik halalca müavinətini ən yüksək tribunalardan tələb etməliyik. Bu pul söhbəti deyil, ədalətin zəfər çalması məsələsidir!
Zeynəbin pulunu verin!
P.S. İşdir, əgər ağzıgöyçəklərdən kimsə desə ki, onda siz də Nairuinin pulunu verin, bu yersiz olacaq, çünki o xanım hələ 2000-ci ildə qondarma “Dağlıq Qarabağ Respublikası”nın xalq artisti adını qəbul edərək separatçılara qoşulub və bu səbəbdən bizdən heç bir şey gözləyə bilməz.
Səhifəmizdə hər hansı səhv və ya qeyri-dəqiq məlumat gördükdə, həmin mətni seçib Ctrl+Enter düymələrini sıxaraq bu barədə bizə məlumat verməyinizi xahiş edirik.
