İlin sonu yaxınlaşdıqca bəzi qurumlar geridə qalan ilin ən yaxşılarını seçməyə başlayıblar.
Əslində bütün seçimlər, müqayisələr qüsurlu olsa da, istənilən halda görünən işlərə nəzərən kiminsə fərqləndirilməsi həvəsləndirmə baxımından yaxşıdır.
Di gəl ki, bu seçimlər zamanı obyektivliyi qorumaq, layiq olanı fərqləndirmək işin ən çətin hissəsidir.
Elə bizim Gənclər və İdman Nazirliyi də belə çətinliklə üzləşib. Nazirlik keçirdiyi böyük mərasimlə həm illik hesabatını təqdim edib, həm də öz sahələrində fərqlənən şəxsləri, xüsusilə də jurnalistləri təltif edib.
Bir haşiyə çıxaraq qeyd edim ki, bu kimi seçimlər, fərqləndirmələr, mənə Sovetdən qalma, mənasız adət kimi gəlsə də, bunu gözləyən, sevinən, istəyən şəxslərin hisslərinə də hörmətlə yanaşıram.
Bu dəfə nazirliyin təltifetməsində maraqlı adlarla qarşılaşdıq. Mən bir-bir sadalayıb kimin hansı ada layiq görüldüyünü, kimin buna layiq olub-olmamasını qabartmaq fikrində deyiləm.
Amma təqdimatdan sonra yaranmış narazılıq və qarşılıqlı atışma haqqında bir az bəhs edəcəm.
Deməli, ölkədə fəaliyyət göstərən iki idman kanalından birinin – CBC Sportun rəsmisi, tanınmış jurnalist və şərhçi Rüstəm Əfsərli ilin ən yaxşı idman kanalı nominasiyasında kənarda qalmaqları ilə bağlı etirazını sosial şəbəkə hesabından bildirdi. Əfsərlinin qeydləri tam olaraq belə idi:
“Gənclər və İdman Nazirliyinin nominasiyalarında qalib gəlmiş həmkarlarımı ürəkdən təbrik edib, onların uğurlarına sevindiyimi tam səmimiyyətimlə qeyd edərək, ölkədə ən çox idman tədbiri işıqlandıran CBC Sport kanalının adının növbəti dəfə bu siyahıda olmaması ilə əlaqədar bəyan edirəm ki, həqiqətən də Azərbaycanda öz sahəsindən bu qədər başı çıxmayan ikinci nazirlik yoxdur”.
Həmkarımızın fikirlərinin səhv və ya düz olmasını qoyaq bir kənara, düşünürəm ki, dozası yerində, təhqir elementi olmayan, bir az da yumorla bəzədilmiş, özünəməxsus, maraqlı yanaşmadır.
Fikirlə razılaşan da olar, razılaşmayan da, amma nazirlik rəsmisinin buna reaksiyası fikrin özündən daha çox ajiotaj yaratdı.
Gənclər və İdman Nazirliyinin mətbuat xidmətinin rəhbəri Səmayə Məmmədova elə “Facebook” vasitəsilə Rüstəmə hədə-qorxu dolu mesaj ünvanladı:
“2019-cu ilin idman yekunlarına dair ADBTİA-da keçirilən tədbirdən sonra CBC Sport telekanalının əməkdaşı Rüstəm Əfsərlinin öz Facebook səhifəsində Dövlətin gənclər və idman siyasətinə cavabdeh olan qurumunu şəxsi ambisyasına görə qeyri-peşəkarlıqda ittiham etməsi, nazirliyin ölkə başçısının rəhbərliyi ilə apardığı gənclər və idman siyasətinə qarşı atılan addımı kimi qiymətləndirilir.
Nazirlik bu mövzu ilə bağlı atacağı addımları qısa zamanda ictimaiyyətə açıqlayacaq”.
Səmayə xanımın mövqeyi nazirliyin rəsmi mövqeyidirmi, bilmirəm, amma istənilən halda peşəkar reaksiya kimi qarşılana bilməz.
Bu açıqlama ən yaxşı halda məktəb uşağının sinif yoldaşından müəllimə şikayəti, ən pis halda isə donosa bənzəyir.
Bəli, 21-ci əsrdə kiminsə işlətdiyi təhqirsiz ifadəyə görə bu şəkildə hədələnməsi donosbazlıqdan başqa bir şey deyil.
Belə çıxır ki, hansısa dövlət qurumunu haqlı tənqid etmək, onun fəaliyyətini sorğulamaq dövlətin siyasətinə zidd getməkdir?
Tariximizə qırmızı-qanlı hərflərlə düşmüş 37-ci il repressiyalarına necə də oxşayır, deyilmi?
Halbuki, elə Səmayə xanımın sığındığı “Prezidentin siyasəti” məsələsini birinci elə bu təhdid özü pozmurmu?
Axı ölkə başçısı da dəfələrlə vurğulayıb ki, jurnalistlər mənim ən yaxın dostlarım, köməkçilərimdi, onlar yerlərdə olan haqsızlıqları, qanunsuzluqları yazaraq mənə çatdırırlar.
Bəs indi necə olur ki, kiçik bir tənqidi yazı Gənclər və İdman Nazirliyində bu qədər təlaşa, narahatlığa səbəb olur?
Bir müddət bundan əvvəl AFFA haqqındakı tənqidi fikirlərinə görə ATV kanalındakı işi ilə hədələnən İlkin Xəlilovdan sonra növbəti hədəf Rüstəm olmamalıdır.
Yaxşı hal deyil, həmkarlarımızın öz fikirlərinə görə bu şəkildə təhdid olunması, hansısa vasitələrlə hədələnməsi ölkə adına da, demokratiya adına da utanılacaq hərəkətdir.
21-ci əsrin ikinci on illiyinin astanasında 37-ci il rüzgarlarının əsməsinə imkan vermək olmaz.
Səhifəmizdə hər hansı səhv və ya qeyri-dəqiq məlumat gördükdə, həmin mətni seçib Ctrl+Enter düymələrini sıxaraq bu barədə bizə məlumat verməyinizi xahiş edirik.
