Həyatda paxıllıq etdiyim insan qrupu gəzənlərdir. Kiminsə harasa, mən bilmədiyim, tanımadığım yerə getdiyini eşitsəm ona həm həsəd aparıram, həm də zəli kimi yapışıram. O qədər sual verirəm ki, adam bezir.
Paxıllıq etdiyim adamlardan biri 15 ilə yaxın dostluq etdiyim təbrizli Əsəddir. Bir neçə ildir öz peşəsi həkimliyi buraxıb dünyanı gəzir. Bir evi var idi, onu satdı, karavan maşın aldı. Maşın dediyim şey elə öz-özlüyündə evdir, soyuducusundan tutmuş, duş kabinəsinə qədər hər şeyi var. İndi o, Stokholmda oturur maşına, çıxır dünya turuna. Bir gün Ukraynada, başqa gün Misirdə. Bir gün Barselonadan gəlir səsi, başqa gün Vilnüsdən. Ünsiyyətcil tip olduğundan getdiyi yerin insanları ilə əlaqə qurur, onları tanıyır, mətbəxini öyrənir, yeni mədəniyyətlər kəşf edir. Həyat gəzdikcə gözəldir…
Mənə Venesiya haqqında Əsəd çox şey danışmışdı, amma necə deyərlər, eşitmək ilə görmək eyni dadı vermir. Ona görə ora getmək həvəsim çoxdan yaranmışdı. Reklam olsa da, bilməyən dostlara xatırlatmaq üçün deyim ki, “Easyjet” Hava Yolları Avropada səyahət üçün bir nemətdir. Uyğun tariflərə tuş gəlsəniz dörd nəfərlik bir ailə ilə hansısa uzaq bir şəhərə 100-150 avroya gedib-gələ bilərsiniz.
Sizə çox gəzən, gəzməyi sevən bir adam kimi deyim ki, bəzi şəhərlər var, bu şəhərlər öz ağırlığı ilə adamı sıxır. O qədər ağır şəhərdir ki, adam bu ağırlığı qaldıra bilməyəcək deyə ora getməyə tələsmir. Misal üçün Vyana mənim üçün belə şəhərlərdəndir. Və ya Milan. Mənim yaşadığım şəhərdən Milana maşınla 3 saatlıq yoldur, amma mənə o qədər uzun gəlir ki, heç cür ora gedib çıxa bilmirərm.
Venesiya da belə şəhərlərdən biri idi. Fikirləşirdim ki, bu şəhərdə özümü sıxılmış hiss edəcəyəm. Amma belə olmadı. Düzdür, insanlığın su içində yaratdığı bu möhtəşəm abidə o qədər əzəmətlidir ki, günün bütün saatlarında adamı valeh edir. Amma buna baxmayaraq da çox yumşaq şəhərdir. Hər kateqoriyaya aid insan burda özünü rahat hiss edə bilir.
XIII əsrdən başlayaraq təqribən 3 əsr Adriatik və Aralıq dənizi sularında donanması və ticarəti ilə at oynadan bu şəhər haqqında, Antonio Vivaldinin müşayiətində videolar tapıb baxa bilərsiniz. Və ya, əgər baxmamısınzsa, 2010 istehsalı “Turist” filminə baxsanız, Venesiyanın necə bir yer olduğunu çox yaxşı başa düşəcəksiniz. Bu filmdə Angelina Jolie və Johnny Deppin məqsədi sanki izləyicilərə Venesiyanı tanıtmaqdır. Necə deyərlər, “çox hörmətli Casanova”-nın macəraları da Venesiya üçün bir duzdur.
Venesiya haqqında ümumi nə yazsam bu sizin üçün yeni olmayacaq, artıq onları bilirsiniz, misal üçün “Grand” başda olmaqla yüzlərlə kanal, San Marko meydanı, Rialto Körpüsü, “romantik ab-hava” və s…
Bir şəhər, bir gəzinti insana informasiya verməklə yanaşı, onda bir təəssürat da yaradır. Məlumatı, informasiyanı başqasına ötürmək olur, təəssüratı yox. Mən sizə gördüyüm şeylərdən yazı və fotolarla informasiya verirəm. Bir şeyin insanda yaratdığı təəssüratı isə izah etmək heç cür mümkün deyil. Ona görə mən sizə fotolar göstərməklə yanaşı 118 adadan ibarət Venesiyanı öz gözlərinizlə görməyi arzu edirəm.
Səhifəmizdə hər hansı səhv və ya qeyri-dəqiq məlumat gördükdə, həmin mətni seçib Ctrl+Enter düymələrini sıxaraq bu barədə bizə məlumat verməyinizi xahiş edirik.
