Bu günlərdə Facebook elan etdi ki, vaksinasiya əleyhdarlarına qarşı tədbirlər görəcək. Bundan qabaq Youtube da vaksinasiyadan imtinaya çağıran videoların monetizasiyasını ləğv etmişdi. Buna səbəb heç də qlobal informasiya yayımçısı olan şəbəkələrin senzuraya meyl etməsi deyil. Əgər vaksindən imtina edənlər və bunu təbliğ edənlər yalnız özləri üçün təhlükə olsaydılar, buna göz yummaq da olardı. Sonucda hər kəsin bədəni, onun şəxsi mülkiyyətidi və əgər fərd yetkin və anlaqlıdırsa, öz vücudundan istədiyi kimi istifadə etməkdə azaddır. Lap gedib başını divara vursun. Özü bilər. Amma vaksinasiya məsələsi şəxsi məsələ deyil.
Haşiyə çıxaraq onu da deyim ki, şəxsən mənim ixtisasca ali təhsilli kimyaçı texnoloq, uzun illər kimya laboratoriyasında iş təcrübəsi olan anam məni inandırmağa çalışır ki, AKDS kimi tanınan adsorbsiya olunmuş göy öskürək, difteriya və tetanusa qarşı polivaksin uşaqlarda autizm yaradır. O birilərini olar, amma bunu vurdurma uşağa deyir. Yəni bunu hələ ali təhsilli kimyaçı deyir. Siz indi təsəvvür edin ki, ali təhsili olmayan və ya humanitar sahələrdə ixtisaslaşmış insanlar bu cür yanlış propoqandadan hansı nəticələrə gəlib çıxa bilərlər.
Məsələ orasındadır ki, vaksinasiya şəxsi sağlamlıq məsələsindən başqa və ondan daha ziyadə kütləvi təhlükəsizlik problemidir. Yəni siz öz uşağınızı vaksinasiya etməməklə təkcə onu riskə atmırsınız. Əgər nəticədə sizin uşağınız xəstələnərsə, bu ümumi epidemioloji şəraiti pisləşdirir, başqa insanların da yoluxma ehtimalını artırır. Çünki vaksinlər əslində xəstəlikdən 100% müdafiə etmir, sadəcə yoluxma riskini azaldır və ya yoluxma baş verdikdə, xəstəliyin daha yüngül keçirilməsini təmin edir. İmmun sistemimiz çox mürəkkəb bir sistemdir. Hər kəsdə də immun reaksiyalar eyni cür getmir.
Bir də infeksion xəstəliklərin törədiciləri əsasən təkhüceyrəli bakteriyalar və heç hüceyrə belə olmayan viruslardır. Bu isə o deməkdir ki, onlar çox tez mutasiyaetmə xüsusiyyətinə malikdirlər. Düşdükləri mühitə daha tez adoptasiya olunurlar.
İnsan 20-30 ildən bir nəsil artırırsa, bir bakteriya əlverişli şəraitdə və sahibinin orqanizmində 24 saat ərizində 34 trilliondan çox nəsil verə bilər. Viruslardan heç danışmağa dəyməz. Ona görə də əgər bir insanın deyək ki, quyruğunu itirməsi üçün milyon illər lazımdısa, qrip virusunun bir dərmana qarşı davamlılığının yaranması üçün bir xəstəlik mövsümü kifayət edir.
Beləliklə müxtəlif epidemioloji tədbirlər nəticəsində qarşısı alınmış xəstəlik hətta bir insanda belə yenidən inkişaf etməyə imkan tapırsa, bunun nəticələri hamı üçün çox dəhşətli ola bilər.
Bundan başqa vaksinasiya məsələsi həm də insan haqları məsələsidir. Vaksinlərin çoxu uşaq yaşlarında vurulmalı olduğundan bu barədə qərarı təbii ki, uşağın özü yox, valideynlər verir. Bu halda valideyn öz məsuliyyətini dərindən anlamalı və verdiyi qərarla övladı olsa da, başqa bir insanın sağlamlığı, bəzi hallarda isə həyatı barədə qərar verdiyini başa düşməlidir.
1980-ci ildə BMT tərəfində bütün dünya üzrə aparılmış qlobal immunizasiya tədbirləri nəticəsində Adi Ospa xəstəliyinin kökünün kəsildiyi elan edildi. Hər il minlərlə insanın ölümünə səbəb olan bu dəhşətli xəstəliyin törədiciləri günümüzdə yalnız iki laboratoriyada xüsusi təhlükəsiz mühitdə saxlanır. Maraqlananlar bu xəstəlik barədə 1982-ci ildə Goran Marković`in çəkdiyi “Variola Vera” filminə baxa bilərlər.
Siz təsəvvür edirsinizmi bu nə deməkdir? İnsanlıq bir xəstəliyin tamamilə kökünü kəsib. Zira bir növün kökünü kəsməkdə biz həmişə usta olmuşuq. Amma bu halda söhbət milyonlarla həyatın xilasından gedir.
Vaksinasiya sayəsində artıq minlərlə uşağın həyatına son qoyan difteriya, tetanus, insanı ömürlük əlil arabasına bağlayan poliomielit epidemiyaları baş vermir.
Bütün bunlar barəsində əsərlər yazılmış, filmlər çəkilmiş, bütün platformalarda ictimai müzakirələr keçirilmiş faktlardır.
Bu qədər aşkar və real arqumentləri görməzdən gələrək, bir uğursuz və ixtisasından qovulmuş ingilis həkiminin autizm barədə səfsətə fikirlərini əldə bayraq edib, minlərlə insanı təhlükəyə atmaq ən yaxşı halda axmaqlıq, əslində isə cinayətdir.
