Bu gün, Azərbaycan diasporası tək Avropada yox, Şərqdən Qərbə, dünyanın əksər aparıcı ölkələrində artıq bir fakta çevrilib. Diasporamızın arasında yaradıcı adamlar, ziyalılar, elm sahəsinin intellektualları var. Onlar xaricdə yaşasalar da, ölkələrini sevirlər, məsuliyyət hiss edirlər. Bunu bilirik.
Bəs biz neçə nəfərik? Biz, vətənimizdəki problemlər barədə nə düşünür, o problemlərin həlli üçün nələri təklif edirik? Biz, bütün imkanlarımızı kooperasiya etsək, bundan nə qazanarıq? Bunu bilmək üçün vətənimizdən kənarda yaşayan ziyalıların, elm və mədəniyyət adamlarının bir araya gəlməsinə, ortaq bir tribunaya sahib olmasına ehtiyac aydın hiss ediləcək dərəcədə çoxdur.
AzLogos-un məqsədi, intellektual diasporamızın nə etdiyi, nə düşündüyünü dilə gətirməkdir. Bu sayt, Azərbaycanda yaşayan soydaşlarımıza göstərəcək ki, Avropada kimlər var, nə edir, hansı uğurları qazanır, ölkləri ilə bağlı nələr düşünür və nə etmək istəyirlər. Müxtəlif sahələrdə uğur qazanmış azərbaycanlılar, soydaşları ilə bir platformada görüşəcəklər. Xaricdə yaşayan intellektual soydaşlarımız bir-birlərini tanıyacaq, bir şəbəkə yaradacaqlar. Bütün sahələrin peşəkarları əməkdaşlıq imkanı əldə edəcəklər. Bundan gözəl nə ola bilər? Axı biz, eyni zamanda gələcək nəsillərə nümunə olmalıyıq, onlara faydalı şeylər öyrətməliyik.
İstərdim ki, AzLogos-da ortaq və geniş müzakirələrə yer ayrılsın. Kültür, elm və ekologiya kimi günümüzün ən vacib mövzuları müzakirə olunsun. Siyasət barədə də müzakirələr vacibdir. Bu gün dünyada siyasət necə aparılır, hansı dünya məsələləri müzakirə edilir? Diskussiya tərzləri hansılardır? Məşhur danimarkalı jurnalist, Georg Brandes, yüz il əvvəl demişdi ki, istənilən cəmiyyət debatlar bazasında inkişaf edir. Debatlar mütləqdir, debatsız toplum məhv olmuş toplumdur. Odur ki, bizim saytımızda konstruktiv və dialoqa istiqamətlənmiş tənqid olacaq. Artıq ən mütərəqqi standartları əxz etməyin zamanıdır, siyasi xalq kimi azərbaycanlılar tərəqqipərvər olmalıdırlar. Dünyanı tanımalıdırlar, özlərini tanıtmalıdırlar.
Mənim arzum budur ki, biz öz vətənimiz üçün nəsə edək. Məsələn, aparıcı texnologiyalar tətbiq edərək, Azərbaycanın ekoloji problemlərini həll edək, çünki bu sahədə vəziyyət olduqca pisdir. Dünya iqlim toplantısının Azərbaycanda keçirilməsi ən böyük arzumdur. Bizdə buna çox böyük ehtiyac var. Azərbaycan və bölgəmizdə ekologiya problemlərini qabardacaq mütəxəssislərə ehtiyacımız var. Axı biz insanıq, təkcə özümüzü deyil, ölkəmizlə yanaşı, dünyamızı da düşünməliyik.
AzLogos bizə öz üfüqlərimizi genişləndirmək imkanı verəcək. Dünyanın hər yerində yaşayan intellektualları, peşəkarları soraqlayacaq, bir araya gətirməyə, müzakirələrə, debatlara dəvət etməyə çalışacaq. Eyni zamanda, bu platforma gələcək üçün də vacib bir arxiv rolunu oynayacaq. Buna görə də, gələcək planlarımızdan biri, saytımızın ingilisdilli versiyasını yaratmaqdır.
Bizimlə olduğunuza, bizi oxuduğunuza görə, hamınıza təşəkkür edirəm.
AzLogos-da qalın.
Hörmətlə
Məsud Aşina
Nevrologiya professoru, Danimarka Nevrologiya və Başağrısı mərkəzi, Kopenhagen Universiteti.
Səhifəmizdə hər hansı səhv və ya qeyri-dəqiq məlumat gördükdə, həmin mətni seçib Ctrl+Enter düymələrini sıxaraq bu barədə bizə məlumat verməyinizi xahiş edirik.
